ចូលរួមទាំងអស់គ្នាដើម្បីរម្លឹកប្រវត្តិមួយសតវត្សរ៍នៃរបាំព្រះរាជទ្រព្យខ្មែរ
របាំព្រះរាជទ្រព្យមានប្រវត្តិតាំងពីយូរលង់ណាស់មកហើយ ហើយក៏ត្រូវបានមូលនិធិ អ្នកម្នាង ផាត់កាញុល និងអង្គការយូណេស្កូ គាស់រំលើងថែរក្សានិងដាក់សម្តែងជូនទស្សនិកជនឲ្យចូលរួមទស្សនា ចំនួនពីរថ្ងៃ ក្រោមប្រធានបទ “Memories in motion” នៅក្នុងសន្និសិទកាសែតមួយកាលពីព្រឹកថ្ងៃទី ០៧ ខែ ធ្នូ ឆ្នាំ២០១៧ នៅសណ្ឋាគារ រ៉ាហ្វលភ្នំពេញ ក្រោមព្រះរាជអធិបតីភាព សម្តេចព្រះរាជបុត្រី ព្រះរាមនរោត្តមបុប្ផាទេវី ព្រះអង្គម្ចាស់ ស៊ីសុវត្ថិ តេស្សូ អ្នកមុខអ្នកការនិងអ្នកសារព័ត៍មានជាច្រើនរូបផងដែរ។ថ្លែងចេញពីសន្និសិទកាសែតនោះ សម្តេចព្រះរាជបុត្រី ព្រះរាមនរោត្តមបុប្ផាទេវីដែលជាអតីតអ្នករបាំមួយអង្គដែរនោះ បានមានព្រះបន្ទូរឲ្យដឹងពីគោលបំណងក្នុងការរៀបចំកម្មវិធីសម្តែងរបាំព្រះរាជទ្រព្យនោះគឺដើម្បីចង់ផ្សព្វផ្សាយពីរបាំនេះឲ្យភាពទូលំទូលាយជាងមុន និងចង់បង្ហាញពីទម្រង់សិល្បះដ៏មានអត្ថន័យរបស់ខ្មែរដើម្បីឲ្យសាធារណៈជនអាចស្វែងយល់និងសិក្សាស្រាវជ្រាវ ក៏ដូចជាប្រវត្តិខ្លះៗពីក្បាច់របាំនេះផងដែរ។ ក្នុងឱកាសនៃការសម្តែងសិល្បៈនោះលោកអ្នកក៏អាចស្វែងយល់ពីការវិវឌ្ឍនៃទម្រង់សិល្បៈរបាំព្រះរាជទ្រព្យជាបីដំណាក់កាលដោយចាប់ពីរជ្ជកាលព្រះបាទស៊ីសុវត្ថិ ឆ្លងកាត់រជ្ជកាលព្រះមហាក្សត្រីយានី ព្រះស៊ីសុវត្ថិ កុសុមៈ រហូតដល់រជ្ជកាលសម័យព្រះបាទនរោត្តម សីហនុផងដែរ។ ជាងនេះទៅទៀតក៏មានការសម្តែងទម្រង់សិល្បៈល្ខោនខោលនៅថ្ងៃនោះដោយមានការចូលរួមសម្តែងដោយក្រុមសិល្បករប្រមាណជាង២០នាក់។
គួរជម្រាបផងដែរ ការសម្តែងរបាំព្រះរាជទ្រព្យនេះនឹងប្រព្រឹត្តិទៅចំនួនពីរថ្ងៃ ដោយគិតចាប់ពី ថ្ងៃទី ១២ ខែមករា ឆ្នាំ ២០១៨ វេលាម៉ោង ៦:៣០ ល្ងាច រហូតដល់ ម៉ោង ៨ យប់, ថ្ងៃទី ១៣ ខែមករា ឆ្នាំ ២០១៨ វេលាម៉ោង ៣:៣០ រសៀល ដល់ម៉ោង ៥ ល្ងាច និងថ្ងៃទី ១៣ ដដែល ចាប់ពីម៉ោង ៦:៣០ ល្ងាច រហូតដល់ម៉ោង ៨ យប់។ លោកអ្នកអាចស្វែងរកជាវសំបុត្រចូលទស្សនានៅ មជ្ឈមណ្ឌលវប្បធម៌ភាសាបារាំង, មជ្ឈមណ្ឌលធនធានសោទស្សន៍បុប្ផាណា, Khema Pasteur និង kwest Restaurant ឬលោកអ្នកក៏អាចទិញសំបុត្រអនឡាញ តាមរយៈលីងខាងក្រោមនេះ៖
http://last2ticket.asia/en/events/459/memories-in-motion-the-royal-ballet-of-cambodia
ដូច្នេះកុំភ្លេចចូលរួមទាំងអស់គ្នា ដើម្បីលើកស្ទួយទម្រង់សិល្បៈរបាំព្រះរាជទ្រព្យយើង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។