ករណីដុតផាវភ្លើង៖ AFC ពិន័យវៀតណាម១៥០០០ដុល្លារ និងកម្ពុជា៥០០០ដុល្លារអាមេរិក
សហព័ន្ធកីឡាបាល់ទាត់ទ្វីបអាស៊ី (AFC) កាលពីថ្ងៃទី២៧ ខែតុលា បានផ្សព្វផ្សាយការសម្រេចពិន័យជិត៥០ករណីទាក់ទងនឹងការរៀបចំការប្រកួត ក៏ដូចជាភាពមិនប្រក្រតីនានាក្នុងការប្រកួតបាល់ទាត់នៅអាស៊ី។ ករណីផាវភ្លើងរបស់ក្រុមអ្នកគាំទ្រវៀតណាម នាជំនួបវគ្គជម្រុះ AFC Asian Cup ឆ្នាំ២០១៩ នៅពហុកីឡដ្ឋានជាតិអូឡាំពិក កាលពីថ្ងៃទី៥ ខែកញ្ញា ក៏ត្រូវរងការពិន័យផងដែរ។
គណៈកម្មការវិន័យ និងក្រមសីលធម៌របស់ AFC បានសម្រេចពិន័យសហព័ន្ធកីឡាបាល់ទាត់វៀតណាម ក្នុងទឹកប្រាក់១៥០០០ដុល្លារអាមេរិក ពីបទរំលោភលើលក្ខន្តិកៈមាត្រា ៦៥.១ ដោយសារតែអ្នកគាំទ្រវៀតណាម បានដុតផាវភ្លើង រហូតដល់ទៅ២លើក នាអំឡុងនៃជំនួបរវាងកម្ពុជា និងវៀតណាម ក្នុងវគ្គជម្រុះ AFC Asian Cup ឆ្នាំ២០១៩ នៅពហុកីឡដ្ឋានជាតិអូឡាំពិក។
ករណីដូចគ្នាផងដែរ សហព័ន្ធកីឡាបាល់ទាត់កម្ពុជា ក្នុងនាមជាម្ចាស់ផ្ទះរៀបចំការប្រកួត ត្រូវរងការបន្ទោសថា មិនមានការរៀបចំឲ្យបានត្រឹមត្រូវ ដោយបណ្តោយឲ្យអ្នកគាំទ្រវៀតណាមយកផាវភ្លើងចូលកីឡដ្ឋាន។ កម្ពុជា រងពិន័យជាទឹកប្រាក់ ៥០០០ដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។