សម្ដេចតេជោ ហ៊ុន សែន ថ្លែងថានៅថ្ងៃទី២៩ ខែធ្នូ ២០១៨ខាងមុខនឹងត្រូវរៀបចំពិធីខួប២០ឆ្នាំនៃនយោបាយឈ្នះ-ឈ្នះ
សម្ដេចតេជោ ហ៊ុន សែន បានថ្លែងថា នៅថ្ងៃទី២៩ ខែធ្នូ ឆ្នាំ២០១៨ខាងមុខ នឹងមានរៀបចំធ្វើពិធីខួបរំលឹកលើកទី២០ នៃនយោបាយឈ្នះ-ឈ្នះ តាមរយៈការសាងសង់នូវវិមានឈ្នះ-ឈ្នះ ដ៏ធំមួយដើម្បីរំលឹកអំពីការបញ្ចប់សង្គ្រាមតាមរយៈនៃនយោបាយឈ្នះ-ឈ្នះ។សម្ដេចតេជោ ហ៊ុន សែនដូចនេះ នៅព្រឹកថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨ នេះ ក្នុងឱកាសអញ្ជើញជួបសំណេះសំណាលជាមួយកម្មករកម្មការិនីចំនួនជិត២ម៉ឺននាក់ មកពីរោងចក្រសហគ្រាសចំនួន៨ នៅភូមិរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ។
សម្ដេចតេជោ ហ៊ុន សែន បានគូសបញ្ជាក់ថា ប្រសិនបើកាលពីពេលនោះពុំមានការអនុវត្តន៍នូវនយោបាយឈ្នះ-ឈ្នះនោះទេដែលអាចបញ្ចប់បាននូវសង្គ្រាម កុំថាឡើយឱកាសដែលយើងមានការងារធ្វើ គឺមានតែឱកាសរត់លូនក្រាបច្រើនជាងឱកាសរស់នៅបានសុខស្រួលប្រកបដោយសុភមង្គលដូចសព្វថ្ងៃនេះ។
សម្ដេចតេជោ ហ៊ុន សែន បានបន្ថែមថា នៅពេលដែលប្រទេសជាតិមួយមានសង្គ្រាមហើយ មិនត្រឹមតែលំបាកតែអ្នកដែលប្រឈមមុខដាក់គ្នានោះទេ អ្នកដែលនៅផ្នែកខាងក្រោយក៏លំបាកដែរ។ សូម្បីតែពលរដ្ឋស៊ីវិលក៏ត្រូវបានប្រមូលដើម្បីឱ្យជួយដឹកស្បៀងទៅកាន់សមរភូមិដែរ មានពេលខ្លះវាយទៅវាយមករាប់ទាំងការបោកគ្រាប់បែកគ្រប់កន្លែង វាយផ្តាច់ផ្លូវ វាយផ្តាច់ស្ពាន និងវាយរំខានដើម្បីកុំឱ្យកងទ័ពរដ្ឋាភិបាលមានលទ្ធភាពទៅវាយនៅកន្លែងដទៃបាន។
ប្រមុខរាជរដ្ឋាភិបាលកម្ពុជា ក៏បានសង្កត់ធ្ងន់ថា ប្រទេសកម្ពុជាយើងឆ្លងកាត់ការលំបាកគ្រប់បែបយ៉ាងច្រើនពេកហើយ ដោយសារនយោបាយឈ្នះ-ឈ្នះដែលមានឪពុកម្តាយជីដូនជីតារបស់កម្មករកម្មការិនីដែលបានចូលរួមចំណែកគាំទ្រអនុវត្តនូវនយោបាយឈ្នះ-ឈ្នះរបស់លោក ទើបធានាបាននូវការបញ្ចប់ទាំងស្រុងនៃសង្គ្រាម រក្សាបាននូវសុខសន្តិភាពនិងការអភិវឌ្ឍដែលអាចលើកកម្ពស់បាននូវជីវភាពរស់នៅរបស់កម្មករកម្មការិនីនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។