ក្រសួងបរិស្ថានគាំទ្រគម្រោងសង់រោងចក្រផលិតស្ពាន់នៅខេត្តព្រះសីហនុ
ក្រសួងបរិស្ថានបានសម្រេចគាំទ្រគម្រោងរោងចក្រផលិតស្ពាន់ សំណ ស័ង្កសី និងអាស៊ីតស៊ុលផួរិចតម្លៃ៣០លានដុល្លារអាមេរិកនៅក្នុងក្រុងព្រះសីហនុ។ ការប្រកាសគាំទ្រនេះ ធ្វើឡើងក្រោយពីក្រសួងបរិស្ថានបានបើកកិច្ចប្រជុំជាមួយអន្តរក្រសួងដើម្បីពិនិត្យ និងវាយតម្លៃពីផលប៉ះពាល់លើគម្រោងនេះ។
មុនឈានទៅសម្រេចគាំទ្រលើគម្រោងនេះ ក្រសួងបរិស្ថាន និងអន្តរក្រសួងបានពិនិត្យ និងពិភាក្សាយ៉ាងហ្មត់ចត់លើចំណុចសំខាន់ៗចំនួន៦ គឺទី១ការគ្រប់គ្រងលើការនាំចូល ការទុកដាក់វត្ថុធាតុដើម និងសារធាតុគីមី។ ទី២ ផែនការប្រើប្រាស់ទឹក ទី៣ ការគ្រប់គ្រងគុណភាពខ្យល់(ឧស្ម័ន ធូលី) ទី៤ ការគ្រប់គ្រង់សំណល់រឹង-រាវ ទី៥ ខ្សែសង្វាក់ផលិតកម្ម និងទី៦ បញ្ហាសុខភាព និងសុវត្ថិភាពការងារ ។ ក្រៅពីសម្រេចគាំទ្រលើគម្រោងនេះ ក្រសួងបរិស្ថាន និងអន្តរក្រសួងក៏បានសម្រេចឲ្យក្រុមហ៊ុនដែលសាងសង់រោចចក្រថ្មីនេះ ត្រូវកែលម្អរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញក្នុងរយៈពេល ៣០ថ្ងៃ យ៉ាងយូរផងដែរ។
សូមបញ្ជាក់ថា គម្រោងខាងលើនេះ ជាការវិនិយោគរបស់ក្រុមហ៊ុន CAMBODIAN CHAOTHUO MINING & METALLURGY CO., LTD (ឆាវទូ ម៉ាញនីង & មេធលឡឺជី) ដែលទទួលការអនុញ្ញាតឲ្យពីក្រុមប្រឹក្សាអភិវឌ្ឍន៍កម្ពុជា(CDC) កាលពីខែកុម្ភៈកន្លងទៅ។ រោចក្រនេះ អាចនឹងជួយបង្កើតការងារឲ្យប្រជាពលរដ្ឋខ្មែរចំនួន៤៤០នាក់។ គម្រោងរោងចក្រថ្មីនេះ នឹងសាងសង់លើផ្ទៃដីទំហំ ៧,៤៨ហិកតា ក្រោមទុនវិនិយោគចំនួន ៣០លានដុល្លារអាមេរិក ស្ថិតក្នុងតំបន់សេដ្ឋកិច្ចពិសេស ក្រុងព្រះសីហនុ ក្នុងភូមិពូធឿង ឃុំបិតត្រាំង និងភូមិស្មាច់ដែង ឃុំរាម ស្រុកព្រៃនប់ ក្រុងព្រះសីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។