ចោរស្ទាវមួយក្រុមត្រូវបានចាប់ខ្លួនក្នុងបទចោរកម្ម

ប៉ៃលិន ៖ កាលពីវេលាម៉ោង ២១:៤៥ នាទីយប់​​​​ ថ្ងៃ​អង្គារ​ ១៤រោច​ ខែជេស្ឋ​ ឆ្នាំច​ សំរឹទ្ធិស័ក​ព.ស២៥៦២​ ត្រូវនឹង​ថ្ងៃទី១១ ខែមិថុនា ឆ្នាំ២០១៨​ កម្លាំងជំនាញនៃអធិការនគរបាលស្រុកសាលាក្រៅ បានសហការណ៍ជាមួយកម្លាំងប៉ុស្តិ៍នគរបាលរដ្ឋបាលស្ទឹងត្រង់ដើម្បី

ធ្វើការចុះបង្រ្កាបករណី ចោរកម្ម(លួចម៉ូតូ) មួយករណីក្រោយពីជនសង្ស័យចំនួន ០៤ នាក់ធ្វើសកម្មភាពរួចរយៈពេល ២១ម៉ោង ដោយ​គិត​ពីវេលាម៉ោង ០០:៤៥ នាទីរំលងអធ្រាត្រ​ឈានចូលថ្ងៃ​អង្គារ​ ១៤រោច​ ខែជេស្ឋ​ ឆ្នាំច​ សំរឹទ្ធិស័ក​ព.ស២៥៦២​ ត្រូវនឹង​ថ្ងៃទី១១ ខែមិថុនា ឆ្នាំ២០១៨ នៅចំណុចភូមិ ផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។

ក្រុមចោរទាំងបួនមានឈ្មោះដូចជា ជនសង្ស័យទី ០១ ឈ្មោះ ផេង ម៉ាលីហ៊ាង ភេទប្រុស​ អាយុ ១៨ឆ្នាំ មុខរបរ សិស្ស រស់នៅភូមិឃុំ​កើត​ហេតុ​ខាងលើ​។ ជនសង្ស័យទី ០២ ឈ្មោះ ឆាន ភារម្យ ភេទប្រុស អាយុ​ ១៨ឆ្នាំ មុខរបរ មិនពិតប្រាកដ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ ជនសង្ស័យទី ០៣ ឈ្មោះ តូច តូ មុខរបរ មិនពិតប្រាកដ ភេទប្រុស អាយុ ២៣ឆ្នាំ នឹងជនសង្ស័យទី ០៤ ឈ្មោះ យន្ត ហៃ ភេទប្រុស អាយុ ២០ឆ្នាំ មុខរបរ មិនពិតប្រាកដ ជនសង្ស័យ​ទាំង​ពីរ​នេះរស់នៅភូមិដូង ឃុំបឹងរាំង ស្រុកកំរៀង ខេត្តបាត់ដំបង ។

កម្លាំងជំនាញនៃអធិការនគរបាល​ដកហូត​បាន​វត្ថុ​តាង​រួមមាន: ដែកកេះសម្រាប់ជក់គ្រឿងញៀនចំនួន ០៥ ឧបករណ៍​សម្រាប់ជក់គ្រឿងញៀនចំនួន០១​​​ ដែកឆាបចំនួន ០១ ដើម ព្រមទាំងម៉ូតូ ០១ គ្រឿងម៉ាក Honda Dream C125 ពណ៌ ខ្មៅ ស៊េរី ឆ្នាំ ២០១៦ (គ្មានស្លាកលេខ) មានលេខម៉ាសីុន ៩៥៧៨៤៩៩ ដែលជារបស់ជនរងគ្រោះឈ្មោះ មឿង រ៉ាឌី ភេទប្រុស អាយុ​ ២២ឆ្នាំ មុខរបរ បុគ្គលិកកាសីុណូ(សារ៉ក់បូរី) រស់នៅភូមិ ផ្សារព្រំ ឃុំ ស្ទឹងកាច់ ស្រុក សាលាក្រៅ ខេត្ត ប៉ៃលិន ។ ​ បច្ចុប្បន្នជនសង្ស័យខាងលើត្រូវបានឃាត់ខ្លួនទុកនៅ អធិការនគរបាលស្រុកសាលាក្រៅ ដើម្បីកសាងសំណុំរឿងតាមនីតិវិធីច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Close