ហ្វៃ សំអាង ខកចិត្តបំផុត ក្រោយដឹងអតីតផ្កាយរះក្នុងសួន ជាប់ពន្ធនាគារ
ក្រោយឃាត់ខ្លួនជាច្រើនថ្ងៃ ទើបតែបែកធ្លាយ រឿងអតីតបេក្ខជនក្នុងកម្មវិធី “ផ្កាយរះក្នុងសួន” ទួន ឆានឈុន ត្រូវបានសមត្ថកិច្ចចាប់ខ្លួនកន្លងទៅពីបទជិះម៉ូតូឆក់ទូរស័ព្ទនារីម្នាក់នៅម្ដុំផ្សារអូរឫស្សី រួចមកបានធ្វើឲ្យ អ្នកជួយជ្រោមជ្រែង និងជាអ្នករៀបចំកម្មវិធី លោក ហ្វៃ សំអាង ខកចិត្ត និងសោកស្ដាយបំផុតចំពោះហេតុការណ៍មួយនេះ។
ហ្វៃ សំអាង អ្នករៀបចំកម្មវិធី”ផ្កាយរះក្នុងសួន” បានរៀបរាប់ថា ខ្លួនមានអារម្មណ៍សោកស្ដាយខកចិត្តយ៉ាងខ្លាំង ដោយមិននឹកស្មានអតីតបេក្ខជនរូបនេះទៅប្រព្រឹត្តិអំពើដែលសង្គមគេស្អប់ខ្ពើមដូច្នេះសោះ។ គួរតែយកសមត្ថភាពដែលខ្លួនមានទៅប្រកបរបរចិញ្ចឹម មិនគួរយកកេរ្តិ៍ឈ្មោះខំសាងឡើងយ៉ាងលំបាកលំបិនទៅបំផ្លាញត្រឹមមួយប៉ប្រិចភ្នែកនោះទេ។
លោក ថា ទោះបីជា ទួន ឆានឈុន មិនបានកាន់ពានក្នុងកម្មវិធី”ផ្កាយរះក្នុងសួន” ក្ដី តែរូបគេបានទទួលពានប្រជាប្រិយភាពពីគណៈកម្មការ និងទស្សនិកជនជាច្រើននៅសមត្ថភាពសំឡេងរបស់គេ។
“ខ្ញុំគ្មានពាក្យអ្វីត្រូវនិយាយ ក្រៅពីសោកស្ដាយនោះទេ ព្រោះខ្ញុំមិននឹកស្មានថា គាត់ទៅប្រព្រឹត្តិអំពើដើរលួចឆក់គេដូច្នេះអ៊ីចឹងទេ។ ហេតុអ្វីគាត់មិនយកសមត្ថភាពដែលគាត់មានទៅប្រើប្រើប្រាស់ប្រកបរបរចិញ្ចឹមជីវិត”។ លោក ហ្វៃ សំអាង ថ្លែងបញ្ជាក់។
ទួន ឆានឈុន ជាអតីតបេក្ខជនក្នុងកម្មវិធី “ផ្កាយរះក្នុងសួន” រដូវកាលទី១ ឆ្នាំ ២០១៣ ត្រូវបានសមត្ថកិច្ច ចាប់ខ្លួននៅថ្ងៃទី៨ ខែមេសា ឆ្នាំ២០១៨ ពីបទធ្វើសកម្មភាពឆក់ទូរស័ព្ទ iPhone ពីនារីម្នាក់នៅ នៅត្រង់ចំណុចម្ដុំអូឫស្សី តាមបណ្ដោយផ្លូវលេខ ២១៥ កែងផ្លូវលេខ ១៤៦ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។