ម្ចាស់គំរោងវិនិយោគប្តឹងអតីតឧកញ៉ា ហូរ ចំរើន រឿងឆបោកប្រាក់ជាង២០០លានដុល្លារ
ភ្នំពេញ ៖ ប្រភពព័ត៌មានច្បាស់ការណ៍ពីសាលាដំបូងរាជធានីភ្នំពេញបានឲ្យដឹងថា ម្ចាស់គំរោងវិនិយោគបរទេសចំនួនបីនាក់ បានដាក់ពាក្យបណ្តឹងចូលមកអយ្យការអមសាលាដំបូងរាជធានីភ្នំពេញប្រឆាំងនិងអតីតឧកញ៉ា ហូរ ចំរើន ពីបទសីុដាច់លុយ ជាង២០០លានដុល្លារអាមេរិក ។
សំណុំរឿងទាំង៣ករណីគឺស្ថិតក្នុងដៃលោកព្រះរាជអាជ្ញារង សៀង សុខ ក្នុងនោះមានសំណុំរឿងមួយត្រូវបានតំណាងអយ្យការធ្វើការចោទប្រកាន់ជាផ្លូវការបញ្ជូនទៅចៅក្រមសើុបសួរពិនិត្យតាមនីតិវិធី ចំណែកសំណុំរឿងពីរផ្សេងទៀតអយ្យការអមតុលាការកំពង់ពិនិត្យនៅឡើយ ហើយបានកំណត់ពេលឲ្យដើមបណ្ដឹងចូលមកឆ្លើយបំភ្លឺនៅថ្ងៃទី ២៥ ខែមិថុនា ឆ្នាំ២០១៨ ខាងមុខនេះ ។
ពាក់ព័ន្ធបណ្ដឹងព្រហ្មទណ្ឌថ្មីទាំងបីសំណុំរឿងនេះ ដែលបានដាក់ពាក្យប្ដឹងប្រឆាំងលោក ហូរ ចំរើន ត្រូវបានប្រភពមួយអះអាងថា មានក្រុមហ៊ុនវិនិយោគបរទេសមួយបានពឹងពាក់ឲ្យអតីតឧកញ៉ា ហូរ ចំរើន រៀបចំទិញដីជាច្រើនហិកតានៅក្នុងក្រុងតាខ្មៅ ខេត្តកណ្ដាល ដើម្បីសាងសង់មន្ទីរពេទ្យធំមួយ ទំនើប ហេីយមានលក្ខណៈស្តង់ដាទាន់សម័យ ដែលមានទុនវិនិយោគរហូតដល់ជាង ២០០លាន ដុល្លារអាមេរិក។ ក្នុងនោះក្រុមហ៊ុនបានទំលាក់សាច់ប្រាក់មុនចំនួន៨០លានដុល្លារ ឲ្យលោក ហូរ ចំរើន ដើម្បីរៀបចំនិងចាប់ផ្ដើមអនុវត្តគំរោង ប៉ុន្តែចាប់តាំងពីបានទទួលសាច់ប្រាក់ ៨០លានដុល្លារនោះមក មិនដែលឃើញលោក ហូរ ចំរើន អនុវត្តន៍កិច្ចការគំរោងសាងសង់មន្ទីរពេទ្យនោះចេញទេ រហូតដល់ថ្ងៃមានរឿងប្រើអាវុធបាញ់គំរាមឨពុកម្ដាយក្មេក ហើយត្រូវតុលាការសម្រេចឃុំខ្លួនលោក ហូរ ចំរើន ដាក់ពន្ធនាគារ ទើបម្ចាស់គំរោងវិនិយោគសន្មត់ថាអតីតឧកញ៉ារូបនេះបាន ឆបោកប្រាក់ទើបដាក់ពាក្យប្ដឹងមកតុលាការតែម្ដង ។
ចំណែកបណ្ដឹងពីរទៀតក៏ជាប់ពាក់ព័ន្ធនិងបទល្មើសឆបោកប្រាក់នៅក្នុងគំរោងវិនិយោគលើវិស័យអចលនទ្រព្យដូចគ្នានេះដែរ ដោយចាញ់ឧបាយកល់ឆបោករបស់លោក ហូរ ចំរើន ដែលមានទឹកប្រាក់រាប់រយលានដុល្លារអាមេរិកផងដែរ។
សូមរម្លឹកថា អតីតឧកញ៉ា ហូរ ចំរើន ត្រូវបានកម្លាំងសមត្ថកិច្ចក្រសួងមហាផ្ទៃបញ្ជូនខ្លួនមកកាន់សាលាដំបូងរាជធានីភ្នំពេញនារសៀលថ្ងៃទី១៦ ខែឧសភា ឆ្នាំ២០១៨ ពាក់ព័ន្ធការបាញ់បោះគំរាមកំហែងឪពុកម្ដាយក្មេកកាលពីថ្ងៃទី២១ ខែមេសា ឆ្នាំ២០១៨កន្លងទៅ នៅភូមិគ្រឹៈស្ថិតនៅភូមិព្រៃស សង្កាត់ព្រៃស ខណ្ឌដង្កោ រាជធានីភ្នំពេញ។ លោក ហូរ ចំរើន អតីតជាមន្ត្រីយោធាក្រសួងការពារជាតិថ្នាក់ឧត្តមសេនីយ៍ឯក ត្រូវបានព្រះមហាក្សត្រតែងតាំងជាឧកញ៉ានៅថ្ងៃទី១២ ខែមេសា ឆ្នាំ២០១៨ និងមានមុខងារជាទីប្រឹក្សាថ្នាក់ដឹកនាំកំពូល ប៉ុន្តែក្រោយពេលជាប់ឃុំនៅពន្ធនាគារ ព្រះមហាក្សត្របានចេញព្រះរាជក្រឹត្យបញ្ចប់មុខតំណែងទាំងអស់រាប់ទាំងមុខងារជាឧកញ៉ាផងដែរ ៕
លោក ហូរ ចំរើន
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។