អូស្ត្រាលីបញ្ចូនក្រុមឯកទេសទៅជួយរំដោះក្មេងចេញពីរូងភ្នំនៅប្រទេសថៃ
អូស្ត្រាលី-ថៃ ៖ នៅថ្ងៃទី៥ ខែកក្កដា រដ្ឋមន្ត្រីការបរទេស អូស្ត្រាលីលោក Julie Bishop បានប្រកាសថា បានបញ្ជូនអ្នកឯកទេសពីររូបទៅកាន់ប្រទេសថៃ ដើម្បីជួយសង្គ្រោះ ក្រុមកីឡាករកុមារថៃដែលកំពុងតែជាប់គាំនៅក្នុងរូងភ្នុំថាំលួង ដោយសារតែទឹកលិច។
ប្រភពព័ត៌មានបានឲ្យដឹងថា ក្រៅពីបញ្ជូន អ្នកឯកទេសពីររូប អូស្ត្រលីក៏បានបញ្ជូនមន្ត្រីទាហានជើងទឹក ទៅជួយផងដែរ ។ មន្ត្រីអូស្ត្រាលីនិងសហការជាមួយកម្លាំងជួយសង្គ្រោះជម្រុះ ជួយជនរង្គ្រោះនៅរូងភ្នំ។
ក្រៅពីអូស្ត្រាលី រដ្ឋាភិបាលថៃក៏បានស្នើរដល់កម្លាំងទាហានជើងទឹកពិសេសរបស់អាមេរិក ប្រចាំនៅមហាសមុទ្រប៉ាស៊ីហ្វិក ៣០រូបនិងឧប្បករណ៍ទំនើបៗ ទៅជួយរំដោះកុមារចេញពីរូងភ្នំ ។
កាលពីថ្ងៃទី៤ខែកក្កដា មន្ត្រីថៃ បានឲ្យដឹងថា នឹងបង្រៀន កុមារទាំងនោះ ហែលទឹកនិងមុជទឹក ដោយប្រើប្រាស់បំពងអ៊ុកស៊ីហ្សែន ដើម្បីចេញមកក្រៅ។
ឧប្បនាយករដ្ឋមន្ត្រីថៃ លោក Prawit Wongauwan បានឲ្យដឹងថា ទឹកនៅក្នុងរូងភ្នំហូខ្លាំង ហើយខ្យល់នៅក្នុងរូងភ្នំក៏កាន់តែតិចទៅ។ដូច្នេះការបញ្ចូនកុមារទាំងនោះចេញក្រៅនាពេលនេះ គឺជារឿងដ៏លំបាកបំផុត ដោយត្រូវមានការចូលរួមពីក្រុងជួយសង្គ្រោះច្រើននាក់។
ព័ត៌មាន CNN បានដកស្រង់សម្តីនាយករដ្ឋមន្ត្រីថៃថា រូងភ្នំថាំលួង ជាដែលក្រុមអ្នកជួយសង្រ្គោះថៃ និងអន្តរជាតិ កំពុងដុតដៃដុតជើងយកក្មេង១២នាក់ និងគ្រូបង្វឹកបាល់ទាត់ របស់ពួកគេម្នាក់ចេញមកខាងក្រៅ អាចនឹងក្លាយជាគោលដៅទេសចរណ៍មួយដ៏សំខាន់។
ថ្លែងចេញពីការិយាល័យរបស់ខ្លួននៅថ្ងៃអង្គារសប្ដាហ៍នេះ នាយករដ្ឋមន្រ្តីថៃ លោកប្រាយុទ្ធ ចាន់អូចា បានគូសបញ្ជាក់ដូច្នេះថា៖« រូងភ្នំស្ថិតនៅក្នុងខេត្តឈៀងរ៉ាយ ភាគខាងជើងនៃប្រទេស ទំនងអាចនឹងក្លាយជាកន្លែងដ៏ល្បីល្បាញទាំងនៅក្នុងស្រុក និងពិភព លោក ហើយវាក៏អាចនឹងក្លាយជាតំបន់ទេសចរណ៍ដ៏សំខាន់ផងដែរ។ ដូច្នេះយើងត្រូវតែចាត់វិធានការធានាសុវត្ថិភាពឱ្យស្របទៅ តាមសកម្មភាពទេសចរណ៍»។
គួររំលឹកថា ក្មេងៗទាំង១២នាក់ និងគ្រូបង្វឹកបាល់ទាត់ពួកគេម្នាក់ ត្រូវបានក្រុមអ្នកខាងមុជទឹក មកពីចក្រភពអង់គ្លេសចំនួនពីរនាក់ រកឃើញថានៅមានជីវិត នៅឡើយកាលពីថ្ងៃចន្ទ នៅម៉ោងប្រមាណ ១០៖២៥នាទីយប់ ដោយស្ថិតនៅចំងាយប្រហែល០៤គីឡូ ម៉ែត្រពីមាត់រូងភ្នំ។ ប៉ុន្តែ ក្រុមជំនាញថៃ និងអន្តរជាតិ ដែលកំពុងបំពេញប្រតិបត្តិការនៅឡើយនៅតំបន់រូងភ្នំថាំលួង ស្រុកម៉ែសៃ នៃខេត្តឈៀងរ៉ាយ ភាគខាងជើងប្រទេសថៃនោះ បានវាយតម្លៃថាគេអាចនឹងត្រូវប្រើពេលរាប់សប្ដាហ៍ ដើម្បីយកជនរងគ្រោះទាំង ១៣នាក់ ចេញពីរូងភ្នំនេះបាន។
ក្រុមជំនាញត្រូវបង្ហាត់ពួកគេទាំង ១៣នាក់ ពីរបៀបមុជទឹក និងប្រើប្រាស់បរិក្ខាមុជទឹកជាមុនសិន ខណៈស្បៀងអាហារ បំពង់អុក ស៊ីហ្សែន និងថ្នាំពេទ្យកំពុងត្រូវបានក្រុមសង្គ្រោះផ្សេងទៀតបញ្ជូនទៅខាងក្នុងរូងភ្នំជាបណ្ដើរៗហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។