លិចនាវា៣គ្រឿងក្នុងថ្ងៃតែមួយនៅប្រទេសថៃបណ្ដាលឲ្យអ្នកដំណើរចិនជាច្រើនបាត់ខ្លួន
ថៃ ៖ យ៉ាងហោចណាសមានអ្នកដំណើរ៤៩នាក់ បាត់ខ្លួន និងម្នាក់ស្លាប់នៅក្នុងហេតុការ លិចនាវាទេសចរណ៍ ដឹកអ្នកដំណើរ ៩៧នាក់ នៅតំបន់សមុទ្រ កោះភូគេត ប្រទេសថៃ កាលពីថ្ងៃទី ៥ខែកក្កដា។
អភិបាលខេត្តភូគេត លោក Norapat Plodthong បានឲ្យដឹងថា មកទលពេលនេះ មានអ្នកដំណើរតែ៤៨នាក់ត្រូវបានជួយសង្គ្រោះ ភាគច្រើនជាជនជាតិចិន ក្រោយលិចនាវា Phoeniz PD Diving នៅតំបន់សមុទ្រ Andaman ។
មេបញ្ជាការ កងទ័ពជើងទឹកថៃ លោក Somnuk Prempramote បានឲ្យដឹងថា« បច្ចុប្បន្ន យើងនៅតែមិនទាន់រកឃើញមនុស្ស៤៩នាក់បាត់ខ្លួននៅឡើយ ហើយបានជួយសង្គ្រោះតែ៤៨នាក់ប៉ុណ្ណោះពីនាវាក្រឡាប់លិច ។យើងបានស្នើរដល់នាវាជួយសង្គ្រោះទៅកាន់កន្លែងកើតហេតុ អ្នកដំណើរទាំងអស់គឺបានពាក់អាវ ពោងការពារផងដែរ»។ សាកសពបុរសម្នាក់ ពាក់អាវពោងមាន លូហ្គោ នាវាPhoenix បានបញ្ចូនឡើងគោក នៅរសៀលថ្ងៃទី៥។
ករណីលិចនាវាខាងលើ កើតឡើង ក្នុងពេលដែលនាវាកំពុងតែធ្វើដំណើរចេញពីកោះ រ៉ូចា ឆ្ពោះទៅកាន់ខេត្តភូគេតនៅវេលាម៉ោង ១៦ ថ្ងៃទី៥ខែកក្កដា។ កាពីទែន បញ្ចានាវាខាងលើ លោក Somjing Boontham បានឲ្យដឹងថា មានរលក់កម្ពស់ ជាង ៥ម៉េត្រ ធ្វើឲ្យក្រឡាប់ នាវាខាងលើ ។
កម្លាំងទាហានជើងទឹកថៃបានឲ្យដឹងថា ការលិចនាវាខាងលើគឺជា នាវាទី៣ហើយដែលបានលិចក្នុងថ្ងៃតែមួយ។ នាវាពីរគ្រឿងផ្សេងទៀត ក្នុងនោះ មានមួយគ្រឿងដឹកអ្នកដំណើរ ៣៩នាក់ ក៏បានលិច ប៉ុន្តែអ្នកដំណើរទាំងអស់ បានសង្គ្រោះទៅកាន់តំបន់សុវត្ថភាពទាន់ពេល។
កម្លាំងទាហានការពារដែនសមុទ្រថៃ បានប្រមានថា អាកាសធាតុ អាក្រក់ មានខ្យល់ខ្លាំង រលក់ធំៗ បន្តកើនឡើងរហូតដល់ថ្ងៃទី១០ខែកក្កដា ដោយមានទាំងភ្លៀងធ្លាក់ខ្លាំងទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។