សមត្ថកិច្ចក្របួចក្រុមចោរឆក់១០នាក់ ដែលធ្វើសកម្មភាពជិះម៉ូតូឆក់ទ្រព្យសម្បត្តិប្រជាពលរដ្ឋក្នុងក្រុងសៀមរាប
ក្រុមចោរឆក់វ័យក្មេងចំនួន១០នាក់ ត្រូវបានសមត្ថកិច្ចការិយាល័យនគរបាលព្រហ្មទណ្ឌកម្រិតស្រាលខេត្តសៀមរាប សហការជាមួយអធិការនគរបាលស្រុកប្រាសាទបាគង ស្រុកសូទ្រនិគម និងក្រុងសៀមរាប ក្រសោប និងក្របួចបានកាលពីថ្ងៃម្សិលមិញនេះ ក្រោយពីគ្នីគ្នារបស់គេចំនួន២នាក់បានធ្វើសកម្មភាពឆក់ទ្រព្យសម្បត្តិប្រជាពលរដ្ឋតាមដងផ្លូវតែមិនបានសម្រេច។
យោងតាមការបញ្ជាក់របស់សមត្ថកិច្ចថា មុននឹងឈានដល់ការក្រសោបក្រុមចោរឆក់ទាំងសំបុកនេះ គឺដំបូងនៅថ្ងៃទី១០ ខែកក្កដាឆ្នាំ២០១៨ វេលាម៉ោង០៥និង៣០នាទី នៅត្រង់ចំណុចផ្លូវជាតិលេខ៦ ភូមិរលួសខាងលិច ឃុំរលួស ស្រុកប្រាសាទបាគង មានករណីអំពើលួច ឆក់កាបូប បង្កឡើងដោយជនសង្ស័យចំនួន២នាក់ ១-ឈ្មោះ សាង ប៊ុណ្ណារ៉ាត់ ២-ឈ្មោះ លឹម ម៉េងហួរ ជិះម៉ូតូ១គ្រឿបម៉ាកហុងដាឌ្រីមស៊េរីឆ្នាំ២០១៨ ពណ៌ខ្មៅ គ្មានស្លាកលេខ កាំបន្ទះខ្មៅ បានធ្វើសកម្មភាពឆក់ទៅលើជនរងគ្រោះឈ្មោះ ជា ង៉ា ភេទប្រុស អាយុ៣៦ឆ្នាំ រស់នៅភូមិត្រពាំងទឹម ឃុំកណ្តែក ស្រុកប្រាសាទបាគង មិនបានសម្រេច ក៏ត្រូវសមត្ថកិច្ចស្រុកប្រាសាទបាគង ធ្វើការកាក់ឃាត់ជនសង្ស័យនឹងម៉ូតូបាន យកមកធ្វើការសួរនាំ។ បន្ទាប់មកក៏ឈានទៅឃាត់ខ្លួនបក្ខពួកជាបន្តបន្ទាប់។
ជាមួយនឹងការឃាត់ខ្លួននោះ សមត្ថកិច្ចក៏បានដកហូតសម្ភារៈវត្ថុតាងមាន៖ -អាយភេត(IPad)ពណ៌ខ្មៅចំនួន១ -ទូរស័ព្ទម៉ាកអាយហ្វូនស៉ិច(IPhone6) -ទូរស័ព្ទម៉ាកSamsung -ទូរស័ព្ទណូគាចុចពិល -កាបូបលុយពណ៌ខ្មៅ២ -កាបូបលុយស្រ្តី៤ -ស្ពីកឃឺ១ -កាបូបស្ពាយចំនួន៤ -អាយហ្វូនសេវេនពណ៌ស១(IPhone7) -ម៉ាស្ទឺកាត(Master card)៣ -ស៊ីមកាតក្រៅប្រទេស១ និង-ម៉ូតូចំនួន៣គ្រឿង។
ផ្អែកតាមការចំលើយរបស់ជនសង្ស័យទាំង១០នាក់ខាងលើ ពួកគេបានឆ្លើយសារភាពថា ពិតជាបានធ្វើសកម្មភាពលួចឆក់កាបូបប្រជាពលរដ្ឋនៅក្នុងក្រុងពិតប្រាកដមែន។
យ៉ាងណាក៏ដោយ ប្រជាពលរដ្ឋដែលរស់នៅក្នុងក្រុងសៀមរាប បានសំណូមពរដល់សមត្ថកិច្ច សូមចាត់វិធានការឲ្យបានតឹងរឹងចំពោះក្រុមចោរឆក់ទាំងនោះ ព្រោះថា ក្រុងសៀមរាប គឺជាទិសដៅទេសចរណ៍ដ៏សំខាន់ ហើយពុំដែលមានសកម្មភាពចោរឆក់ដូច្នេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។