ទីបំផុត បារាំងលេីកពាន World Cup 2018
កីឡា ៖ ក្រុមកីឡាបាល់ទាត់ជម្រើសជាតិបារាំងក្លាយជាម្ចាស់ជើងឯក FIFA World Cup 2018 ក្រោយបានយកឈ្នះក្រូអាត ៤-២ នាការប្រកួតវគ្គផ្តាច់ព្រ័ត្រ នៅកីឡដ្ឋាន Luzhniki ក្រុងមូស្គូ ប្រទេសរុស្សីុ។ ជ័យជម្នះនេះបានធ្វេីឲ្យបារាំងបង្កើតកំណត់ត្រាប្រវត្តិសាស្ត្រលើកទី២ក្នុងការឈ្នះពានរង្វាន់បាល់ទាត់ពិភពលោក។
ក្រូអាតបានបង្ហាញទម្រង់លេង និងបច្ចេកទេសដ៏អស្ចារ្យក្នុងការប្រកួតវគ្គផ្តាច់ព្រ័ត្រទល់នឹងបារាំងយប់នេះ។ ប្រហែលជា១០នាទីដំបូងនៃវគ្គទី១ ក្រូអាតបានដាក់សម្ពាធយ៉ាងខ្លាំង ប៉ុន្តែរបាំងការពារបារាំងទប់ស្កាត់បានយ៉ាងល្អ។ បារាំងបានវាយមកមួយៗរហូតមានគ្រាប់បាល់កើតឡើងនៅនាទីទី១៨ដែលជាការតែតចូលទីខ្លួនឯងរបស់ខ្សែប្រយុទ្ធ Mandzukic បន្ទាប់ពីខ្សែប្រយុទ្ធបារាំង Griezmann ស៊ុតបាល់ពិន័យហ្វ្រីឃីក។
បន្ទាប់ពីត្រូវបានបារាំងនាំមុខ ១-០ ក្រូអាតបន្តគ្រប់គ្រងស្ថានការណ៍ និងវាយសម្រុកយ៉ាងខ្លាំងរហូតរកបានគ្រាប់បាល់តាមស្មើ ១-១ នៅនាទីទី២៨ដោយកីឡាករលេចធ្លោ Ivan Perisic។ យ៉ាងណាគ្រាប់បាល់ស្មើនេះរក្សាមិនបានយូរឡើយដោយនាទីទី៣៨ បារាំងបានបាល់ពិន័យ១១ម៉ែត្រដែលធ្វើបានសម្រេចដោយ Griezmann ដើម្បីនាំមុខ ២-១។ ចុងម៉ោងក្រូអាតដាក់សម្ពាធយ៉ាងខ្លាំង ប៉ុន្តែបារាំងអាចរារាំងគ្រាប់បាល់បានរហូតចប់វគ្គទី១។
ចំពោះការប្រកួតវគ្គទី២វិញរឹតតែធ្វើឲ្យអ្នកគាំទ្រស្រែកហ៊ោយ៉ាងខ្លាំងដោយឃើញក្រូអាតបានវាយសម្រុកឥតប្រណីជើងឡើយ។ ការសម្រុកជាបន្តបន្ទាប់នៅវគ្គទី២របស់ក្រូអាតត្រូវបានបារាំងរារាំងបាន។ ផ្ទុយទៅវិញចាប់ពីនាទីទី៥៥ឡើងបារាំងជាអ្នកវាយលុកវិញប្រកបដោយគ្រោះថ្នាក់។ ឱកាសបន្តកើតមានឡើងសម្រាប់ក្រុមបារាំង ដោយ Paul Pogba ប្រើជើងឆ្វេងស៊ុតបាល់បញ្ចូលទីនាំមុខ ៣-១ នៅនាទី៥៩។ នេះជាការព្យាយាមស៊ុតលើកទីពីររបស់ Pogba ក្រោយបាល់ផ្លាតចេញពីខ្សែការពាររបស់ក្រូអាត។
ដល់នាទី៦៥ បារាំង បង្កើនគម្លាតនាំមុខដែលសម្រេចបានដោយកីឡាករវ័យក្មេង Kylian Mbappe ក្រោយការបញ្ជូនរបស់ Lucas Hernandez។ ប៉ុន្តែ៣នាទីក្រោយមក អ្នកចាំទីបារាំង Hugo Lloris បង្កកំហុស ដោយទាត់បាល់ស្រាលៗចេញពីជើងរបស់ខ្លួន ខណៈ Mandzukic ដែលនៅក្បែរនោះ បានឆាបយកបាល់ ហើយទាត់បញ្ចូលទីតាមពីក្រោយក្នុងលទ្ធផល ៤-២ ។
សូមជម្រាបថាចំណាត់ថ្នាក់លេខ២ ជាកំណត់ត្រាប្រវត្តិសាស្ត្ររបស់ក្រូអាត ដោយកាលពីឆ្នាំ១៩៩៨ ដែរនោះ ពួកគេដណ្តើមបានចំណាត់ថ្នាក់លេខ៣ នាការបង្ហាញបង្ហាញខ្លួនលើកដំបូងនៅ World Cup។
ចំណែកលោក Didier Deschamps គ្រូបង្វឹកបារាំងវិញ ក៏រកបានកំណត់ត្រាពិសេសសម្រាប់ខ្លួនផងដែរ ដោយកាលពី២០ឆ្នាំមុន លោកបាននាំបារាំងឈ្នះពានក្នុងនាមជាកីឡាករ ហើយ២០ឆ្នាំក្រោយ លោកបានជួយឲ្យបារាំងឈ្នះពានជាលើកទីពីរ ក្នុងនាមជាគ្រូបង្វឹក៕
ក្រុមបារាំងអបអរសាទរជ័យជម្នះរបស់ខ្លួន
កីឡាករវ័យក្មេង Kylian Mbappe ថេីបពាន World Cup
ក្រុមជម្រេីសជាតិបារាំង
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។