ជំនន់នៅខេត្តមួយចំនួនធូរស្រាលវិញ ក្រសួងកំពុងព្រួយបារម្ភការជន់លិចផ្នែកខ្លះនៃក្រុងភ្នំពេញ និងខេត្តកណ្តាល
យោងតាមសេចក្តីរាយការណ៍ឲ្យដឹងថា នៅព្រឹកថ្ងៃសៅរ៍នេះ ជំនន់នៅខេត្តមួយចំនួនដូចជាខេត្តកោះកុង កំពត កំពង់ស្ពឺ ហាក់ធូរស្រាលបន្តិចវិញហើយ , ជាមួយនឹងការធូរស្រាលនេះ ក្រសួងធនធានទឹកបានបង្វែរការចាប់អារម្មណ៍មកក្នុងភូមិសាស្រ្តរាជធានីភ្នំពេញ និងខេត្តកណ្តាលវិញ។
លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម បានថ្លែងថា ទោះបីជាទឹកជំនន់នៅក្នុងខេត្តកំពង់ស្ពឺបានធូរស្រាលបន្តិច ប៉ុន្តែពេលនេះ ទឹកកំពុងហូរធ្លាក់យ៉ាងគំហុកទៅកាន់ផ្នែកខាងក្រោម តាមស្ទឹងព្រែកត្នោត និងកំពុងគម្រាមកំហែងរាជធានីភ្នំពេញ និងខេត្តកណ្តាល ។ ចំពោះមុខបញ្ហានេះ លោកបានដឹកនាំកម្លាំងផ្ទាល់ ចុះទប់ទល់ជាមួយនឹងទឹកជំនន់នៅតាមទំនប់សណ្តរស្ទឹងព្រែកត្នោត ដើម្បីការពារកុំឲ្យមានការហូរច្រោះ លិចចូលតំបន់ទំនាបក្នុងភូមិសាស្ត្ររាជធានីភ្នំពេញ និងខេត្តកណ្តាល។
ជាមួយគ្នានេះ លោកក៏បានរៀបចំឲ្យមានក្រុមប្រចាំការ ២៤ ម៉ោង លើ ២៤ ម៉ោង សម្រាប់ប្រចាំការ និងតាមដាន ដើម្បីធានានូវសុវត្ថិភាពជូនបងប្អូនប្រជាពលរដ្ឋផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។