លោកត្រាំទទួលបានលិខិត ទីពីរ ពីមេដឹកនាំ គីម ជុងអ៊ុន ស្តីពីជំនួបលើកទីពីរ
សេតវិមានបានបញ្ចាក់ថា ប្រធានាធិបតីអាមេរិកដូណាលត្រាំ ទទួលបានលិខិត ទីពីរ ពីមេដឹកនាំគីមជុងអ៊ុន ប៉ុន្តែមិនបានបញ្ចាក់ពីខ្លឹមសារនៅក្នុងសារលិខិតនោះឡើយ។
សារព័ត៌មាន AFP បានផ្សាយថា សេតវិមាន បានបញ្ចាក់ថាលិខិត របស់គីមជុងអ៊ុនបានបញ្ចូនទៅដល់ដៃ ប្រធានាធិបតីត្រាំ នៅថ្ងៃទី១ខែសីហា ។ អ្នកនាំពាក្យសេតវិមាន Sarah Sanders កាលពីថ្ងៃទី២ខែសីហាបានប្រកាសថា « រាល់ទំនាក់ទំនងរវាងមេដឹកនាំទាំងពីរ គឺជាការអនុវត្តន៍បន្តក្រោយជំនួបនៅក្នុងប្រទេសសឹង្ហបុរី និងជម្រុញការអនុវត្តសេចក្តីប្រកាសរួម ដែលមេដឹកនាំទាំងពីរបានចុះហត្ថលេខា។
ក្រុមអ្នកឯកទេសវិភាគបានលើកឡើងថា ការផ្ញើលិខិតទៅកាន់ប្រធានាធិបតីអាមេរិកដូណាលត្រាំ ជាលើកទីពីរអាចជាសំណើរជួបពិភាក្សាគ្នា លើកទីពីរនៅទីក្រុងវ៉ាស៊ីនតោន ។ ពេលថ្មីៗនេះ មានព័ត៌មានបានផ្សាយថា មេដឹកនាំកូរ៉េខាងជើងគីមជុងអ៊ុនអាចនឹងបំពេញទស្សនកិច្ចទៅកាន់អាមេរិកនៅខែកញ្ញាខាងមុខ ដើម្បីចូលរួម មហាសន្និបាតអង្គការសហប្រជាជាតិ និងថ្លែសន្តរកថាជាលើកតំបូង នៅក្នុងអង្គការកំពូលមួយនេះ។
ទាំងនោះហើយបានជាលោកគីមជុងអ៊ុនផ្ញើលិខិត ទៅកាន់លោកត្រាំ ដើម្បី រៀបចំជំនួបទ្វេភាគីក្រៅកិច្ចប្រជុំអង្គការសហប្រជាជាតិ ។ ក្រៅពីនេះក្រុមអ្នកវិភាគបានលើកឡើងថា អាចនិងមានជំនួបពិភាក្សាទ្វេភាគីជាច្រើនផ្សេងទៀតរវាងមេដឹកនាំកូរ៉េខាងជើងគីមជុងអ៊ុន នឹងបណ្តាមេដឹកនាំសំខាន់ៗជុំវិញពិភពលោក ក្នុងនោះមានរុស្ស៊ីជាដើម។
ទំនាក់ទំនងរវាងកូរ៉េខាងជើងនិងសហគមន៍អនុ្តរជាតិ មានភាពល្អប្រសើរ បន្តិចម្តងៗ ក្រោយ លោកគីមជុងអ៊ុនជួបពិភាក្សាជាមួយប្រធានាធិបតីកូរ៉េខាងត្បូងម៉ូន ជេអីន នៅថ្ងៃទី ២៧ខែមេសា និងជំនួបជាមួយ ប្រធានាធិបតីត្រាំនៅថ្ងៃទី១២ខែមិថុនានៅសឹង្ហបុរី។ ជាមួយគ្នានេះកូរ៉េខាងជើង ក៏កំពុងតែអវុវត្តន៍ទៅតាមសេចក្តីប្រកាសរួម ដោយបានកម្ទេចទីតាំងសាកល្បងបរមាណូ និងការរុះរើទីតាំងសាកល្បងមីស៊ីលឆ្លងទ្វីបជាដើម។
ក្រុមអ្នកឯកទេសបានបញ្ជាក់ថា ប្រសិនបើ លោក គីម ជុងអ៊ុន ទៅកាន់អាមេរិក នៅខែកញ្ញាខាងមុខដើម្បីចូលរួមកិច្ចប្រជុំអង្គការសហប្រជាជាតិ ជារឿងដ៏ល្អបំផុត ហើយកូរ៉េខាងជើង អាចស្នើរដល់អង្គការសហប្រជាជាតិលុបទណ្ឌកម្មមកលើកូរ៉េខាងជើង ដោយជោគជ័យទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។