TripAdvisor ប្រគល់ពានលេខ១ ដល់ប្រាសាទអង្គវត្ត ដែលជាប់ជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោក
ទីបំផុតទៅ កាលពីថ្ងៃម្សិលមិញនេះ ទីភ្នាក់ងារប្រឹក្សាយោបល់លើការធ្វើដំណើរ (TripAdvisor) បានប្រគល់ពានជាផ្លូវការ សម្រាប់ប្រាសាទអង្គរវត្ត ដែលត្រូវបានបោះឆ្នោតជាប់ជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោកសម្រាប់ឆ្នាំ២០១៨ ក្នុងចំណោមសំណង់បុរាណទាំង២៥ នៅលើពិភពលោក។
ការប្រគល់ពាននេះ បានធ្វើឡើងនៅមុខប្រាសាទអង្គរវត្ត ដោយមានវត្តមាន ឯកឧត្តម ថោង ខុន រដ្ឋមន្ត្រីក្រសួងទេសចរណ៍, ឯកឧត្តម ឃឹម ប៊ុនសុង អភិបាលខេត្តសៀមរាប, ឯកឧត្តម សុខ សង្វារ អគ្គនាយករងអាជ្ញាធរជាតិអប្សរា, លោកស្រី សារ៉ា ម៉ាធ្យូស៍ ប្រធាន TripAdvisor ប្រចាំតំបន់អាស៊ី និងមានការចូលរួមពីមន្ត្រីរាជការ មគ្គុទ្ទេសក៍ទេសចរណ៍ ប្រជាពលរដ្ឋ រួមទាំងភ្ញៀវទេសចរជាច្រើនទៀត។
លោកស្រី សារ៉ា ម៉ាធ្យូស៍ ប្រធាន TripAdvisor ប្រចាំតំបន់អាស៊ី បានលើកឡើងថា ការផ្ដល់ចំណាត់ថ្នាក់លេខ១ ដល់ប្រាសាទអង្គរវត្តរបស់ប្រទេសកម្ពុជា ជាទីសំណង់ប្រវត្តិសាស្ដ្រដ៏អស្ចារ្យបំផុតក្នុងឆ្នាំ២០១៨ ធ្វើឡើងតាមរយៈការស្រង់មតិរយៈពេល១២ខែ លើចំណាប់អារម្មណ៍ និង ទស្សនៈរបស់អ្នកទេសចរណ៍រាប់លាននាក់ជុំវិញពិភពលោក កាលពីថ្ងៃទី ២២ ខែឧសភា ឆ្នាំ២០១៨ ។
ឯកឧត្តម សុខ សង្វារ ក៏បានបង្ហាញនូវសុទ្ធិដិនិយមថា តាមរយៈការផ្ដល់ចំណាត់ថ្នាក់លេខ១ ជាសំណង់ប្រវត្តិសាស្ត្រដ៏អស្ចារ្យបំផុតលើពិភពលោកនេះ តំបន់រមណីយដ្ឋានអង្គរទាំងមូលនឹងទទួលបាននូវកំណើននៃភ្ញៀវទេសចរអន្តរជាតិជាច្រើនបន្ថែមទៀត ហើយកម្ពុជាក៏កាន់តែបន្តផ្សព្វផ្សាយទៅកាន់ពិភពលោកកាន់តែទូលំទូលាយទៀតផងដែរ។
ឯកឧត្តមបណ្ឌិត ថោង ខុន បានថ្លែងថា ការរីកចម្រើននៃវិស័យទេសចរណ៍កម្ពុជា ពិតជាមិនអាចកាត់ផ្តាច់ចេញពីការបង្កើនភាពទាក់ទាញរបស់កម្ពុជា ជាគោលដៅទេសចរណ៍ដ៏ទាក់ទាញប្រកបដោយគុណភាព ទាំងកម្រិតតំបន់ និងពិភពលោក ។ ឯកឧត្តមរដ្ឋមន្ត្រីក៏បានសង្កត់ធ្ងន់ថា ក្រសួងទេសចរណ៍បានប្តេជ្ញាចិត្ត បន្តដឹកនាំវិស័យទេសចរណ៍កម្ពុជា ឲ្យកាន់តែរីកចម្រើន ប្រកបដោយនិរន្តរភាព ការទទួលខុសត្រូវ និង បរិយាប័ន្នយ៉ាងទូលំទូលាយ ហើយឯកឧត្តមបានអំពាវនាវដល់ភាគីពាក់ព័ន្ធទាំងអស់ មេត្តាចូលរួមជាមួយក្រសួងទេសចរណ៍ ក្នុងការជម្រុញការងារផ្សព្វផ្សាយគោលដៅទេសចរណ៍កម្ពុជា ឲ្យកាន់តែខ្លាំងក្លាបន្ថែមទៀតនៅលើឆាកអន្តរជាតិ ពិសេសសហការជាមួយ TripAdvisor។
បន្ទាប់ពីបញ្ចប់ពិធី គណៈអធិបតី ប្រតិភូ TripAdvisor រួមជាមួយភ្ញៀវទេរសចរ បាននាំគ្នាជិះកង់រ៉ឺម៉កដង្ហែជាក្បួន បន្តទៅតាមវិថីនានាក្នុងក្រុង ឆ្ពោះមកកាន់តំបន់ ផាប់ស្ទ្រីប ព្រមទាំងមានភ្ញៀវទេសចរណ៍ជាតិ អន្តរជាតិ ចូលរួមកម្សាន្តសប្បាយ នៅក្នុងពិធីជប់លៀងដ៏អធិកអធមមួយនារាត្រីនោះ ក្នុងតំបន់ ផាប់ស្ទ្រីប ដោយមានការប្រគុំតន្ត្រី រៀងរាំសប្បាយ ក្រោមដំបូលសុខសន្តិភាពនៅកម្ពុជាផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។