អាជ្ញាធរជាតិអប្សរា បន្តកិច្ចការអភិរក្ស និងជួសជុលពង្រឹងរចនាសម្ពន្ធឥដ្ឋនៅប្រាសាទគោកចក
ខេត្តសៀមរាប៖ ប្រាសាទគោកចកគឺជាប្រាសាទឥដ្ឋដែលមានចំនួន២ប៉មសង់ទន្ទឹមគ្នាបែរមុខទៅទិសខាងកើតក្នុងរាជព្រះបាទជ័យវរ័ន្មទី៣នាចន្លោះឆ្នាំ ៨៥០គ.ស ដល់ ៨៧៧គ.ស.សម្រាប់ឧទ្ទិសដល់ព្រះនរាយណ៍។ ចំណែកសិលាចារិកនៃប្រាសាទគោកចក (K.521) ក៏បានអធិប្បាយផងដែរអំពី កាលបរិច្ឆេទសាងសង់ប្រាសាទគោកចក្នុងឆ្នាំ ៨៥០គ.ស។
ភាពដ៏ចំណាស់ផ្នែកសម្ភារសំណង់ឥដ្ឋនៃប្រាសាទនេះ បានទទួលរងនូវការទ្រុឌទ្រោមធ្ងន់ធ្ងរពីសំណាក់រុក្ខជាតិតូចធំគ្រប់ប្រភេទដុះចាក់បំបែកប៉មទាំងពីរបណ្តាលឱ្យស្រទាប់ឥដ្ឋនីមួយៗផ្នែកខាងលើនៅតែបន្តរលុះបាក់ដោយអន្លើៗ។ ប្រាសាទគោកចក ត្រូវបានយកចិត្តទុកដាក់លើផ្នែកថែទាំ អភិរក្ស និងជួសជុលឡើងវិញ ច្រើនដំណាក់កាល ទាំងថវិកា និងអ្នកបច្ចេកទេសខ្មែរពីអាជ្ញាធរជាតិអប្សរា។
លោកស្រី ឈុន រតនា ជាមន្ត្រីបច្ចេកទេសអភិរក្សនៃនាយកដ្ឋានអភិរក្សប្រាសាទ ក្នុងឧទ្យានអង្គរនិងបុរាណវិទ្យាបង្ការនៃអាជ្ញាធរជាតិអប្សរាបានផ្តល់នូវទន្និន័យមួយចំនួនស្តីអំពីដំណើរប្រព្រឹត្តិទៅលើផ្នែកការងារអភិរក្សនៃប្រាសាទគោកចកចាប់តាំងពីឆ្នាំ ២០១២រហូតដល់បច្ចុប្បន្ន ក្នុងនោះកិច្ចការទល់ទ្រសង្គ្រោះបន្ទាន់បានធ្វើឡើងនៅក្លោងទ្វារខាងកើតនិងជញ្ជាំងខាងលិចនៃប៉មខាងត្បូងនាឆ្នាំ២០១២កន្លងទៅ។
លោកស្រីបានបញ្ជាក់បន្ថែមថា ទោះបីជាមានការទល់ទ្រត្រង់ចំណុចមានហានិភ័យខ្ពស់មួយចំនួនក៏ដោយ ក៏នៅតែពុំគ្រប់គ្រាន់នៅឡើយសម្រាប់សុវត្ថិភាពប្រាសាទទាំងមូល ព្រោះថា ដុំឥដ្ឋមួយចំនួននៅតែបន្តរលុះធ្លាក់ជាប្រចាំនៅរដូវភ្លៀង ដូចនេះគម្រោងជួសជុលលើរចនាសម្ពន្ធឥដ្ឋបានអនុវត្តឡើងជាផ្នែកៗនៅប៉មខាងត្បូងចាប់ពីខែ កញ្ញា ឆ្នាំ២០១៤ ដល់ឆ្នាំ២០១៥ នាដំណាក់កាលទី១ ហើយរាល់បច្ចេកទេសនៃការជួសជុលប្រាសាទគោកចក គឺមន្ត្រីជំនាញទាំងអស់បានប្រើប្រាស់នូវទ្រឹស្តីនិងទស្សនផ្នែកអភិរក្សលើវិស័យបេតិកភណ្ឌ ដោយគោរពលើបទដ្ឋានអភិក្ស និងច្បាប់ទម្លាប់នានាសម្រាប់ការពារនិងថែរក្សាសំណង់បុរាណ រួមទាំងគិតទៅលើការប្រើប្រាស់សម្ភារថ្មីនិងចាស់បូកបញ្ចូលគ្នាផងដែរដោយរក្សាបានគុណតម្លៃជាប្រវត្តិផ្នែកសិល្បៈនិងប្រវត្តិសំណង់ស្ថាបត្យកម្មនៃប្រាសាទគោកចក។
ជាលទ្ធផលលើគម្រោងអភិរក្សនៃប្រាសាទគោកចកគឺបានបញ្ចប់កិច្ចការជួសជុលពង្រឹងឥដ្ឋដោយផ្នែកៗនៅប៉មទាំងពីរដូចជា ទទួលបាននូវភាពរឹងមាំឡើងវិញត្រង់រចនាសម្ពន្ធខ្លោងទ្វារខាងកើតនិងជញ្ជាំងខាងត្បូងនៃប៉មខាងត្បូង និងបន្តពង្រឹងជញ្ជាំងឥដ្ឋជ្រុងនិរតីនៃប៉មខាងជើង។ ចំណែកសម្រាប់ផែនការនាអនាគត ប្រាសាទគោកចកនឹងគ្រោងបន្តកិច្ចការអភិរក្សនិងជួសជុលបន្ថែម នាដំណាក់កាលទី២ក្នុងឆ្នាំ២០២២នៅប៉មខាងត្បូងផ្នែកខាងលិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។