ស្វាគមន៍វត្តមានដំរីមកពីប្រទេសប៉ាគីស្ថាន ត្រូវបានផ្តល់ជីវិតថ្មី រស់នៅក្នុងតំបន់ព្រៃធម្មជាតិប្រទេសកម្ពុជា
ខេត្តសមៀរាប៖ កម្ពុជា ទទួលបានដំរីឈ្មោល០១ក្បាល ឈ្មោះ ខាវ៉ាន់ អាយុ៣៥ឆ្នាំ ដែលពិភពលោកស្គាល់ថា ជាដំរីឈ្មោលមានជីវិតរស់នៅឯកោ និងគ្មានសេរីភាពនៅក្នុងឧទ្យានជាតិ នៃប្រទេសប៉ាគីស្ថាន ត្រូវបានក្រុមការងារនៃអង្គការពិភពលោក ការពារអភិរក្សសត្វ នាំដំណើរមកដល់អាកាសយានដ្ឋានអន្តរជាតិសៀមរាប តាមជើងហោះហើរពិសេសមកពីប្រទេសប៉ាគីស្ថាន កាលពីរសៀលថ្ងៃទី៣០ខែវិច្ឆិកា ឆ្នាំ២០២០ ។
ជាមួយនឹងមោទនភាព ដែលកម្ពុជាបានស្វាគមន៍ដំរីមួយក្បាល កំពុងមានការចាប់អារម្មណ៍របស់ពិភពលោក ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បានឲ្យដឹងថា វត្តមានដំរីឈ្មោល ឈ្មោះ ខាវ៉ាន់ ដែលមកដល់កម្ពុជានេះ គឺដោយមានការសម្រេចចិត្តពីតុលាការកំពូលនៃប្រទេសប៉ាគីស្ថាន បន្ទាប់ពីមានការតស៊ូមតិអស់រយៈពេល៥ឆ្នាំ របស់អង្គការពិភពលោកការពារអភិរក្សសត្វ អង្គការអភិរក្សដែនជម្រកសត្វព្រៃកម្ពុជា ដែលសង្ឃឹមថាវានឹងមានសេរីភាព និងមានជីវិតរស់នៅក្នុងតំបន់ព្រៃធម្មជាតិអភិរក្ស ដែលអនុញ្ញាតិដោយក្រសួងបរិស្ថាន និងគ្រប់គ្រងការពារដោយ អង្គការអភិរក្សដែនជម្រកសត្វព្រៃកម្ពុជា ។
ឯកឧត្តមរដ្ឋលេខាធិការក្រសួងបរិស្ថាន បានឲ្យដឹងទៀតថា មកដល់បច្ចុប្បន្ននេះ នៅកម្ពុជាមានប្រភេទសត្វដំរីអាស៊ី ប្រមាណពី៤០០ ទៅ៦០០ក្បាល ដែលកំពុងរស់នៅក្នុងតំបន់ព្រៃធម្មជាតិនៃខេត្តមណ្ឌលគិរី រតនគិរី និងនៅតាមជួរភ្នំក្រវាញនៃខេត្តពោធិសាត់ ដែលបញ្ហានេះ ក្រសួងបរិស្ថាន កំពុងយកចិត្តទុកដាក់ទៅលើកិច្ចការ ការពារអភិរក្ស និងថែរក្សាប្រភេទសត្វដំរីអាស៊ី ឲ្យបានល្អបំផុត ហើយក៏សង្ឃឹមដែរថា ខាវ៉ាន់ នឹងកសាងបានគ្រួសារថ្មី នៅក្នុងតំបន់ព្រៃធម្មជាតិ ដែនជម្រកសត្វព្រែ គូលែនព្រហ្មទេព ដែលជាគោលដៅអាណាចក្រថ្មីរបស់គេ ស្ថិតនៅក្នុងដែនភូមិសាស្ត្រខេត្តឧត្តរមានជ័យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។