ព្រឹកនេះ រកឃើញឆ្លង១ករណីទៀត ជាមិត្តភក្តិអ្នកផ្ទុកមេរោគកូវីដ១៩
ភ្នំពេញ៖ក្រសួងសុខាភិបាល បានប្រកាសថា មានអ្នកជំងឺកូវីដ១៩ថ្មី ចំនួនម្នាក់ទៀត ជាអ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា។ នោះគឺស្ត្រីជនជាតិខ្មែរ ឈ្មោះ ទីម ស្រីពេជ្រ អាយុ ២៦ឆ្នាំ មានអាសយដ្ឋាន ស្នាក់នៅខណ្ឌដូនពេញ រាជធានីភ្នំពេញ ជាមិត្តភក្តិរបស់អ្នកជំងឺឈ្មោះ អិត កុម៉ាល ភេទប្រុស អាយុ ៣៥ឆ្នាំ ដែលបានរកឃើញវិជ្ជមានវីរុសកូវីដ១៩ នៅថ្ងៃទី៨ ខែធ្នូ ឆ្នាំ២០២០។
គិតមកដល់ព្រឹកថ្ងៃទី១១ ខែធ្នូ ឆ្នាំ២០២០ អ្នកជំងឺកូវីដ១៩ ដែលបានរកឃើញពាក់ព័ន្ធព្រឹត្តិការណ៍សហគមន៍២៨វិច្ឆិកា មានចំនួន ៤០នាក់ ( ស្ត្រី ១៩នាក់ និងប្រុស ២១នាក់ )។
ក្រសួងសុខាភិបាល ក៏បានប្រកាសឲ្យអ្នកដែលពាក់ព័ន្ធទៅនឹងព្រឹត្តិការណ៍សហគមន៍២៨វិច្ឆិកា ទាំងអស់ ទៅធ្វើតេស្តដោយយកវត្ថុសំណាក លើកទី៣ ដែលនឹងប្រព្រឹត្តទៅ នៅថ្ងៃទី១២ ខែធ្នូ ឆ្នាំ២០២០ នៅតាមទីតាំង ដូចខាងក្រោម៖ ១.បរិវេណក្រសួងមហាផ្ទៃ ( សម្រាប់បុគ្គលិក-មន្ត្រីរាជការ ) ពីម៉ោង ៨ព្រឹក ២.បរិវេណពហុកីឡដ្ឋានជាតិអូឡាំពិក ( សម្រាប់ប្រជាពលរដ្ឋ ដែលបានពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា ) ពីម៉ោង ៧ព្រឹក និងដោយឡែកសម្រាប់អ្នកប៉ះពាល់ទៅនឹងព្រឹត្តិការណ៍សហគមន៍ ២៨វិច្ឆិកា នៅតាមបណ្តាខេត្ត សូមអញ្ជើញទៅធ្វើតេស្ត ជាលើកទី៣ នៅតាមមន្ទីរសុខាភិបាលខេត្ត ដែលទទួលខុសត្រូវ ក្នុងការរៀបចំទីកន្លែងធ្វើតេស្ត វត្ថុសំណាក នៅពេលនោះ សម្រាប់អ្នកពាក់ព័ន្ធនៅតាមខេត្ត។
គិតត្រឹមម៉ោង ៧ព្រឹកថ្ងៃទី១១ ខែធ្នូ ឆ្នាំ២០២០ ក្រសួងសុខាភិបាល ប្រកាសថា នៅទូទាំងប្រទេស មានអ្នកឆ្លងសរុប ៣៥៧នាក់។ ក្នុងនោះ បានជាសះស្បើយ ៣០៧នាក់ និង ៥០នាក់ កំពុងសម្រាកព្យាបាល នៅមន្ទីរពេទ្យរដ្ឋ ( ៣៧នាក់ នៅមន្ទីរពេទ្យមិត្តភាពខ្មែរ-សូវៀត និង ១៣នាក់ នៅមណ្ឌលសុខភាព ចាក់អង្រែ រាជធានីភ្នំពេញ )៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។