ថ្នាក់ដឹកនាំ និងមន្ត្រីកំពូលៗរបស់អាមេរិក នឹងចាក់វ៉ាក់សាំងកូវីដ១៩
អាមេរិក៖ ប្រធានាធិបតីអាមេរិកលោក ដូណាល់ ត្រាំ និងអនុប្រធានាធិបតីលោក ម៉ៃ ភែន ព្រមទាំងមន្ត្រីជាន់ខ្ពស់អាមេរិកដទៃទៀត នឹងត្រូវផ្តល់ការចាក់វ៉ាក់សាំង COVID-19 ដែលនឹងចាប់ផ្តើមពីថ្ងៃចន្ទនេះ (ម៉ោងក្នុងតំបន់) នេះបើតាមសារព័ត៌មាន CNA នៅថ្ងៃទី១៤ ខែធ្នូ ឆ្នាំ២០២០ ។
មន្ត្រីកំពូលៗនៃសេតវិមាន និងមន្ត្រីសំខាន់ៗមួយចំនួនទៀត នៃរដ្ឋបាលលោក ដូណាល់ ត្រាំ នឹងទទួលការចាក់វ៉ាក់សាំង នៅក្នុងរយៈពេល១០ថ្ងៃខាងមុខទៀតនេះ។ ទោះជាបែបនេះក្តី គេមិនទាន់ដឹងច្បាស់នៅឡើយទេថា តើលោក ដូណាល់ ត្រាំ នឹងទទួលការចាក់វ៉ាក់សាំងភ្លាមៗ ឬក៏យ៉ាងណានោះទេ។
មិនតែប៉ុណ្ណោះ ក៏មិនទាន់មានការបញ្ជាក់ថា តើប្រធានាធិបតីជាប់ឆ្នោតលោក ចូ បៃដិន និងអនុប្រធានាធិបតីជាប់ឆ្នោត លោកស្រី កាម៉ាឡា ហារីស ព្រមទាំងមន្ត្រីនៃក្រុមការងាររបស់លោក បៃដិន នឹងទទួលការចាក់វ៉ាក់សាំងដែរ ឬក៏អត់នោះដែរ បើទោះបីជាកន្លងមកនេះ លោក បៃដិន ធ្លាប់ត្រូវបានគេប្រកាសថា នឹងធ្វើការចាក់វ៉ាក់សាំង COVID-19 រួចផ្សាយផ្ទាល់ជូនមហាជនទស្សនា ដើម្បីជាការបង្កើនទំនុកចិត្តក្តី ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។