ថ្ងៃនេះ! កម្ពុជា រកឃើញករណីវិជ្ជមានកូវីដ១៩ថ្មី ៣នាក់ទៀត និង មានអ្នកជាសះស្បើយ ៣នាក់ ក្នុងព្រឹត្តិការណ៍ «សហគមន៍២៨វិច្ឆកា»
ភ្នំពេញ៖ ក្រសួងសុខាភិបាល នៅព្រឹកថ្ងៃទី១៥ ខែធ្នូ ឆ្នាំ២០២០នេះ បានអនុញ្ញាតឲ្យអ្នកជាសះស្បើយពីជំងឺកកូវិដ១៩ចំនួន ៣នាក់ ចេញពីមន្ទីរពេទ្យមិត្តភាពខ្មែរ-សូវៀតហើយ ហើយក៏រកឃើញករណីវិជ្ជមានកូវីដ១៩ថ្មី ៣នាក់ទៀតផងដែរ។
ក្រសួងសុខាភិបាលបានបញ្ជាក់ថា ករណីជាសះស្បើយចំនួន៣នាក់ គឺជាអ្នកពាក់ព័ន្ធព្រឹត្តិការណ៍ «សហគមន៍២៨វិច្ឆិកា» រួមមាន៖
១៖ លោក ឆែម សាវុធ អាយុ៥៧ឆ្នាំ ស្នាក់នៅបុរីប៉េងហួត ផ្លូវ៦០ម៉ែត រាជធានីភ្នំពេញ ជាអគ្គនាយកពន្ធនាគារក្រសួងមហាផ្ទៃ ដោយទទួលបានលទ្ធផលអវិជ្ជមានចំនួន៣ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត។
២៖ ស្ត្រីជនជាតិខ្មែរ អាយុ៣០ឆ្នាំ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាសមាជិកគ្រួសាររបស់អ្នកបើកបរឲ្យលោកអគ្គនាយកពន្ធនាគារ។
៣៖ បុរសជនជាតិខ្មែរ អាយុ៣៤ឆ្នាំ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ធ្វើការនៅក្រសួងមហាផ្ទៃ ដែលជាអ្នកប៉ះពាល់ជាមួយអគ្គនាយកពន្ធនាគារ។
រីឯអ្នកករណីវិជ្ជមាន រួមមាន៖ ១.ស្ត្រីជនជាតិខ្មែរ-អាមេរិក អាយុ៦៦ឆ្នាំ មាអាសយដ្ឋានស្នាក់នៅសណ្ឋាគារមួយ ក្នុងរាជធានីភ្នំពេញ ជាអ្នកដំណើរមកពីសហរដ្ឋអាមេរិក ដោយបន្តជើងហោះហើរនៅប្រទេសកូរ៉េខាងត្បូងមកដល់កម្ពុជានៅថ្ងៃទី១៣ ខែធ្នូ ឆ្នាំ២០២០។
២. ស្ត្រីជនជាតិជប៉ុនអាយុ ៣៤ ឆ្នាំមានអាសយដ្ឋានស្នាក់នៅសណ្ឋាគារមួយក្នុងរាជធានីភ្នំពេញ ជាអ្នកដំណើរមកពីប្រទេសជប៉ុន ដោយបន្តជើងហោះហើរនៅប្រទេសកូរ៉េខាងត្បូងមកដល់កម្ពុជានៅថ្ងៃទី១៣ ខែធ្នូ ឆ្នាំ២០២០។
៣. ជាកុមារាជនជាតិខ្មែរ អាយុ១ឆ្នាំ ដែលជាប់ពាក់ព័ន្ធទៅនឹងព្រឹត្តិការណ៍សហគមន៍ ២៨ វិច្ឆិកា មានអាសយដ្ឋានស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ។ កុមារានេះ ជាកូនរបស់ស្ត្រីជនជាតិខ្មែរអាយុ ៣០ ឆ្នាំដែលវិជ្ជមានវីរុសកូវីដ -១៩ នៅថ្ងៃទី ២៩ ខែវិច្ឆិកាឆ្នាំ ២០២០ ហើយកំពុងសម្រាកព្យាបាលនៅក្នុងមន្ទីរពេទ្យមិត្តភាពខ្មែរ-សូវៀត។
សូមជម្រាបថា ក្រសួងសុខាភិបាល បានរកឃើញអ្នកឆ្លងវីរុសកូវីដ១៩សរុប ៣៦២ករណី ក្នុងនោះអ្នកជំងឺ៣១២ បានជាសះស្បើយ។ ដោយឡែកសរុបអ្នកជំងឺកូវីដ១៩ ដែលរកឃើញពាក់ព័ន្ធព្រឹត្តិការណ៍ «សហគមន៍ ២៨វិច្ឆិកា» ពីថ្ងៃទី២៨ ខែវិច្ឆិកា ដល់ ថ្ងៃទី១៤ ខែធ្នូ ឆ្នាំ២០២០ មានចំនួន៤១នាក់ (ស្រី១៩នាក់ និងប្រុស២២នាក់) ដែលក្នុងនោះមាន៣នាក់ ព្យាបាលជាសះស្បើយ និងសល់៣៨នាក់ទៀត កំពុងសម្រាកព្យាបាលនៅមន្ទីរពេទ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។