សន្និសិទ្ធិសារព័ត៌មាន ករណីបង្ក្រាបគ្រឿងញៀនជិត ១០គីឡូក្រាម នៅក្រុងប៉ោយប៉ែត
ខេត្តបន្ទាយមានជ័យ៖ កាលពីរសៀល ថ្ងៃទី១៦ ខែធ្នូ ឆ្នាំ២០២០ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានធ្វើសន្និសិទ្ធិសារព័ត៌មាន បង្ហាញមុខជនសង្ស័យចំនួន ៣នាក់ ពាក់ព័ន្ធករណីបង្ក្រាបទីតាំងជួញដូរគ្រឿងញៀន២កន្លែង ក្នុងក្រុងប៉ោយប៉ែត។
លោកឧត្តមសេនីយ៍ទោ សិទ្ធិ ឡោះ បានបន្តថា នេះជាប្រតិបត្តិការមួយ ដែលធ្វើឡើងលើពីរទីតាំងឃាត់ខ្លួនមនុស្សចំនួន ៣នាក់ ដកហូតគ្រឿងញៀនជិត ១០គីឡូក្រាម និងដកហូតអាវុធខ្លីសេរីទំនើបមួយដើម។ ជនសង្ស័យទាំង៣នាក់នោះ ឈ្មោះ ទី យៀង ភេទស្រី អាយុ៤៣ឆ្នាំ, ឈ្មោះ ហុង ម៉េង ភេទប្រុស អាយុ១៦ឆ្នាំ និងឈ្មោះ សេង ដាលីសិទ្ធិ ហៅចិន ភេទប្រុស អាយុ៤០ឆ្នាំ។
ប្រតិបត្តិការនេះដែរ សមត្ថកិច្ច បានរកឃើញគ្រឿងញៀនជាង ១០ប្រភេទ មានទម្ងន់ជិត១០គីឡូក្រាម ក្នុងវ៉ាលីចំនួន២ និងកេសដែកមួយ ជាប្រភេទមេតំហ្វេតាមីនម្សៅ ប្រភេទមេតំហ្វតាមីនក្រាម ប្រភេទមេតំហ្វតាមីនដប និងច្រើនមុខទៀត និងកាំភ្លើងខ្លីសេរីទំនើបមួយដើម មានបង់ចំនួន២ និងគ្រាប់មួយចំនួនផងដែរ។
ក្រោយធ្វើសន្និសិទ្ធិបង្ហាញមុខជនសង្ស័យរួច ក្រុមជនសង្ស័យ ត្រូវបាននាំទៅកាន់មន្ទីរប្រឆាំងគ្រឿងញៀននៃក្រសួងមហាផ្ទៃ ដើម្បីបន្តស្រាវជ្រាវរកអ្នកពាក់ពន្ធ័បន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។