ពូជស្រូវជាង ៣តោន ត្រូវបានរឹបអូសពីក្រុមជនល្មើសលាក់លើចុងឈើ ប្រុងសាបព្រួស ក្នុងតំបន់ហាមឃាត់
ខេត្តសៀមរាប៖ សមត្ថកិច្ចចម្រុះ ក្រុងសៀមរាប បានរឹបអូសយកស្រូវពូជ របស់ក្រុមជនល្មើសដែលបានដឹកទៅដាក់នៅលើចុងឈើ ទុកសម្រាប់សាបព្រោះ នៅលើដីលិចទឹកដែលជាតំបន់ហាមឃាត់ បានចំនួនបីតោន។ ជាមួយគ្នានេះ សមត្ថកិច្ចក៏បានរៀបចំកំណត់ហេតុបញ្ជូនវត្ថុតាង (ស្រូវពូជ) ទៅមន្ទីរជំនាញ ដើម្បីរៀបចំសំណុំរឿងបញ្ជូនទៅតុលាការផងដែរ។
ប្រតិបត្តិការនេះអនុវត្តតាមបទបញ្ជារបស់គណៈបញ្ជាការឯកភាពរដ្ឋបាលក្រុង ដឹកនាំដោយ លោកវរសេនីយ៍ទោ មឿន បុរី អធិការរងនគរបាលក្រុងសៀមរាប និងលោក ហាយ យង់ ប្រធានការិយាល័យសាធារណៈការ អនាម័យ បរិស្ថាន និងសណ្ដាប់ធ្នាប់សាធារណៈក្រុង មន្ត្រីមន្ទីរកសិកម្ម បរិស្ថាន។
មន្ត្រីសាលាក្រុងសៀមរាប បានបញ្ជាក់ថា ប្រតិបត្តិការនេះ ធ្វើឡើងកាលពីថ្ងៃទី១៥ ខែធ្នូ ថ្មីៗនេះ នៅក្នុងភូមិសាស្ត្រវាលត្រពាំងរហាល ត្រពាំងដំរីលេង ត្រពាំងផ្ទោលធំ ជាកន្លែងលួចធ្វើស្រូវរដូវប្រាំង របស់ជនល្មើសមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។