រដ្ឋបាលខេត្តកំពតប្រាប់សមត្ថកិច្ចឲ្យស្រាវជ្រាវជនខិលខូចក្លែងបន្លំគណនីហ្វេសប៊ុករបស់លោក ម៉ៅ ធនិន
រដ្ឋបាលខេត្តកំពត កាលពីថ្ងៃទី២៩ ខែតុលា ឆ្នាំ២០២១ បានស្នើសមត្ថកិច្ចបើកការស៊ើបអង្កេត រកជនខិលខូចមួយចំនួន ដែលបានបង្កើតគណនីហ្វេសប៊ុក ដោយដាក់ឈ្មោះ និងរូបថត លោក ម៉ៅ ធនិន អភិបាលខេត្តកំពត ហើយបង្ហោះព័ត៌មានបំភ្លៃ ខុសពីការពិត។
បើតាមរដ្ឋបាលខេត្តកំពតថា ថ្មីៗនេះ នៅតាមបណ្តាញសង្គម មានជនអគតិ ខិលខូចបានបង្កើតគណនីហ្វេសប៊ុក ដោយយកឈ្មោះ និងរូបថតលោក ម៉ៅ ធនិន ធ្វើការផ្សព្វផ្សាយ បង្ហោះរូបភាព កែច្នៃខ្លឹមសារព័ត៌មានមិនពិត ក្នុងចេតនាទុច្ចរិត និងប៉ះពាល់ដល់កេរ្តិ៍ឈ្មោះ កិត្តិយស និងសេចក្តីថ្លៃថ្នូររបស់លោកអភិបាលខេត្ត ។
រដ្ឋបាលខេត្តកំពត បដិសេធ និងច្រានចោលទាំងស្រុង នូវព័ត៌មាន និងការប្រឌិតព័ត៌មាន ដោយយករូបថតលោកអភិបាលខេត្ត ដែលកំពុងមានការគោរព ស្រលាញ់ ពេញចិត្ត ពីសំណាក់បងប្អូនប្រជាពលរដ្ឋ គ្រប់មជ្ឈដ្ឋានទូទៅជាខ្លាំង ដូច្នេះសូមស្នើដល់អង្គភាពជំនាញ បើកការស៉ើបអង្កេត ស្រាវជ្រាវ ស្វែងរកមុខជនល្មើស រួមទាំងបក្ខពួក និងមេក្លោងយកមកផ្តន្ទាទោសតាមច្បាប់ជាធរមាន ។
ជាមួយគ្នានេះដែរ រដ្ឋបាលខេត្តកំពត ក៏បានសំណូមពរដល់សាធារណជន អ្នកសារព័ត៌មាន ពិសេសអ្នកប្រើប្រាស់បណ្តាញទំនាក់ទំនងសង្គម កុំមានការយល់ច្រឡំ និងអំពាវនាវ កុំចូលរួមចែករំលែកព័ត៌មានក្លែងក្លាយទាំងនេះ ដើម្បីចៀសវាងបង្កការលំបាកក្នុងការអនុវត្តភារកិច្ចស្រាជ្រាវរបស់ជំនាញ និងអាចប្រឈមមុខចំពោះផ្លូវច្បាប់ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។