ចៅអធិការវត្តប៉ោយអង្គរ បើករថយន្តជ្រុលទៅបុករថយន្តឡិចស៊ីស RX.300
(បន្ទាយមានជ័យ)៖ កាលពីវេលាម៉ោងប្រមាណ៨យប់ ថ្ងៃទី២៥ ខែសីហា ឆ្នាំ២០២២ មានហេតុការណ៍គ្រោះថ្នាក់ចរាចរណ៍មួយបានកើតឡើង នៅចំណុចខាងមុខសណ្ឋាគាររុងរឿង ស្ថិតក្នុងភូមិគោករដ្ឋាន សង្កាត់អូរអំពិល ក្រុងសិរីសោភណ្ឌ ដោយរថយន្តម៉ាកកាមេរីឆ្លាមមួយគ្រឿងបានរេចង្កូតទៅបុកជាមួយនឹងរថយន្តឡិចស៊ីស RX300 បណ្តាលឱ្យខូចខាត តែមិនបណ្តាលឱ្យរងរបួសមនុស្សទេ តែអ្វីដែលសំខាន់នោះ គឺរថយន្តឆ្លាមត្រូវបានបើកបរដោយព្រះចៅអធិការវត្តប៉ោយអង្គរ។
តាមប្រភពពីអ្នកឃើញហេតុការណ៍បានឱ្យដឹងថា មុនពេលកើតហេតុ រថយន្តម៉ាកឡិចស៊ីស RX.300ពាក់ផ្លាក់លេខ ភ្នំពេញ 2J-8522 បានបើកបរតាមបណ្តោយជាតិលេខ៥ ក្នុងទិសដៅពីលិចមកកើតហើយរថយន្តម៉ាកកាមរីឆ្លាម ពាក់ផ្លាកលេខ ភ្នំពេញ 2L-0874 បានបើកបរក្នុងទិសដៅបញ្ច្រាសទិសគ្នា ពីកើតមកលិច ក្នុងល្បឿនលឿន បានរ៉េចង្កូតទៅឆ្វេងដៃ ជ្រុលទៅបុករថយន្តឡិចស៊ីសខាងក្រោយចំហៀងខាងឆ្វេង ។
ក្រោយពេលគ្រោះថ្នាក់ចរាចរណ៍ភ្លាមៗ គេឃើញកម្លាំងនគរបាលចរាចរណ៍ជើងគោកនៃស្នងការដ្ឋាននគរបាលខេត្តបន្ទាយមានជ័យបានចុះទៅសម្រួលចរាចរណ៍ និងវាស់វែង ឃើញអ្នកបើកបររថយន្តម៉ាកកាមរីឆ្លាមដែលចេញពីរថយន្តឃើញព្រះសង្ឃ២អង្គគង់ខាងមុខ ក្នុងនោះព្រះសង្ឃ១អង្គគង់នៅខាងឆ្វេងជាអ្នកបើករថយន្ត និងស្ត្រីម្នាក់អង្គុយខាងក្រោយ ។ បន្ទាប់មកកម្លាំងសមត្ថកិច្ចបាននិមន្តព្រះសង្ឃ២អង្គ និងស្ត្រីម្នាក់ឡើងរថយន្តប៉ូលីសទៅស្នងការនគរបាលខេត្តបន្ទាយមានជ័យចំណែករថយន្តទាំង២គ្រឿងត្រូវបានស្ទូចយកទៅរក្សាទុកនៅស្នងការនគរបាលខេត្តដើម្បីដោះស្រាយគ្នាតាមច្បាប់។
តាមប្រភពព័ត៌មានពីសមត្តកិច្ចបានឱ្យដឹងថា ក្រោយនិមន្តព្រះសង្ឃ២អង្គ និងស្ត្រីម្នាក់ទៅស្នងការនគរបាលខេត្ត ហើយនៅពេលកម្លាំងជំនាញបានធ្វើតេស្តក្នុងចំណោមព្រះសង្ឃ២អង្គ មានព្រះសង្ឃ១អង្គមានជាតិអាល់កុលហើយជាអ្នកបើកបរទៀត និងជាចៅអធិការវត្តប៉ោយអង្គរ ឃុំតាគង់ ស្រុកម៉ាឡៃ និងស្ត្រីម្នាក់មកជាមួយ គឺជាម្តាយរបស់ព្រះអង្គ ។
តាមប្រភពខាងលើបានបន្តថា មុនពេលគ្រោះថ្នាក់កើតឡើង ព្រះសង្ឃទាំង២អង្គបាននិមន្តមកពីវត្តប៉ោយអង្គរ ឃុំតាគង់ ស្រុកម៉ាឡៃ នាំម្តាយមកលេងវត្តស្វាយចាស់ ដោយបើករថយន្តចេញមកក្រៅចូលហាងក្បែរផ្លូវ រហូតដល់ព្រលប់ ទើបដឹកម្តាយត្រឡប់ទៅផ្ទះនៅស្រុកម៉ាឡៃវិញ លុះពេលបើកបរចេញមកក៏បុ.កជាមួយរថយន្តឡិចឡិចស៊ីស បណ្តាលឱ្យរងការខូចខាតទាំងសងខាងតែម្តង ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។