ពិព័ណ៌ពាណិជ្ជកម្មមិត្តភាពកម្ពុជា-ឥណ្ឌូនេស៊ី នៅខេត្តសៀមរាប នឹងមានក្រុមហ៊ុនជាង១០០ចូលរួម
តាមរយៈសន្និសីទសារព័ត៌មាន ដែលធ្វើឡើងកាលពីថ្ងៃទី១២ ខែកក្កដា រៀបចំឡើងដោយក្រសួងពាណិជ្ជកម្មកម្ពុជាបានឲ្យដឹងថា នៅក្នុងព្រឹត្តិការណ៍ពិព័រណ៌ពាណិជ្ជកម្មមិត្តភាពកម្ពុជា-ឥណ្ឌូនេស៊ី ដែលនឹងប្រព្រឹត្តធ្វើរយៈពេល៣ថ្ងៃ ពីថ្ងៃទី១៩ ដល់២១ កក្កដា នៅលើទឹកដីអង្គរខេត្តសៀមរាប នឹងមានការតាំងបង្ហាញផលិតផលចម្រុះដោយក្រុមហ៊ុនជាង ១០០ក្រុមហ៊ុនមកពីកម្ពុជា និងឥណ្ឌូនេស៊ី។
ជាមួយគ្នាពិព័រណ៌នោះ ក៏មានអមជាមួយវេទិកាធុរកិច្ច កម្មវិធីសម្តែងសិល្បៈ ការប្រកួតកីឡាមិត្តភាព ការផ្លាស់ប្តូរលិខិតអបអរសាទរ ការចងក្រងសៀវភៅមិត្តភាពខួប ៦០ឆ្នាំ មហោស្រពភាពយន្ត និងការសម្ពោធសមិទ្ធផលនានា។
គួរជម្រាបដែរថា ពាណិជ្ជកម្មទ្វេភាគីរវាងកម្ពុជា-ឥណ្ឌូនេស៊ី កាលពីឆ្នាំ២០១៨ សម្រេចបានទឹកប្រាក់ចំនួន ៥៥៨.៦២លានដុល្លារ ក្នុងនោះការនាំចេញរបស់កម្ពុជា ទៅកាន់ឥណ្ឌូនេស៊ី មានទឹកប្រាក់ ៣៣លានដុល្លារ និងនាំចូលមានទឹកប្រាក់ ៥២៥.៦លានដុល្លារ។ គិតត្រឹមខែមេសា ឆ្នាំ២០១៩ ទំហំពាណិជ្ជកម្មទ្វេភាគីមានចំនួន ១៩៦.២៦លានដុល្លារ គឺបានកើនឡើង ១០.៤៨% ធៀបរយៈពេលដូចគ្នា ក្នុងឆ្នាំ២០១៨។
សម្រាប់កិច្ចសហប្រតិបត្តិការសេដ្ឋកិច្ច ភាគីទាំងពីរបានចុះអនុស្សរណៈ ស្តីពីការមិនយកពន្ធត្រួតគ្នា និងការបង្ការអំពើបន្លំពន្ធពាក់ព័ន្ធប្រាក់ចំណូល ព្រមទាំងអនុស្សរណៈស្តីពីការកសាងសមត្ថភាពលើវិស័យកសិកម្ម និងសេដ្ឋកិច្ច។ ដោយឡែកសម្រាប់វិស័យទេសចរណ៍ កាលពីថ្ងៃទី២១ ខែមិថុនា ឆ្នាំ២០១៩ ឥណ្ឌូនេស៊ីបានបង្កើតជើងហោះហើរត្រង់ ពីទីក្រុងហ្សាកាតា-ភ្នំពេញ-ហ្សាកាតា ដោយក្រុមហ៊ុន City Link Indonesia រៀងរាល់ថ្ងៃច័ន្ទ-ពុធ-សុក្រ ដោយប្រើប្រាស់យន្តហោះប្រភេទ Airbus 320 ដែលអាចផ្ទុកអ្នកដំណើរបាន ១៨០នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។