សមត្ថកិច្ចកំពុងតាមស្វែងរកចាប់ខ្លួនមនុស្ស៤នាក់បន្ថែមទៀត ពាក់ព័ន្ធនឹងបទល្មើសព្រៃឈើនៅខេត្តមណ្ឌលគិរី
អ្នកនាំពាក្យគណៈកម្មការជាតិ ដើម្បីទប់ស្កាត់ និងបង្រ្កាបបទល្មើសព្រៃឈើ បានឲ្យដឹងនៅថ្ងៃទី១៥ ខែកក្កដា នេះថា ក្រៅពីជនសង្ស័យចំនួន៤នាក់ ដែលត្រូវនាំទៅកាន់តុលាការ ពាក់ព័ន្ធនឹងបទល្មើសព្រៃឈើនៅខេត្តមណ្ឌលគិរីនោះ នៅមានជនសង្ស័យចំនួន៤នាក់ទៀត ដែលកំពុងរត់គេចខ្លួន ហើយពេលនេះកម្លាំងសមត្ថកិច្ចកំពុងតែធ្វើការស្រាវជ្រាវដើម្បីចាប់ខ្លួនហើយ។
ជាមួយគ្នានេះ បើតាមអ្នកនាំពាក្យថា មកទល់ពេលនេះ ការបំផ្លាញចោលវត្ថុតាងដែលជាមធ្យោបាយដឹកជញ្ជូន នៅតែបន្តអនុវត្តយ៉ាងក្តៅគគុក ហើយថា តាមបទបញ្ជាតឹងរឹង របស់លោកនាយឧត្តមសេនីយ៍ សៅ សុខា គឺមិនអត់ឱនចំពោះបុគ្គលដែលពាក់ព័ន្ធនឹងបទល្មើសព្រៃឈើទេ ដោយត្រូវអនុវត្តច្បាប់ជាដាច់ខាត។
គួរបញ្ជាក់ថា ប្រតិបត្តិការបង្រ្កាបបទល្មើសព្រៃឈើទ្រង់ទ្រាយធំ របស់គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានធ្វើឡើងកាលពីថ្ងៃទី៩ ខែកក្កដា សប្តាហ៍កន្លងទៅនេះ ដោយបានធ្វើការឃាត់ខ្លួនឧកញ៉ាម្នាក់ ព្រមទាំងបក្ខពួក៣នាក់ផ្សេងទៀតបញ្ជូនទៅកាន់តុលាការ ព្រមជាមួយនឹងការដុតកម្ទេចចោលនូវរថយន្តដឹកឈើធុនធំៗជាច្រើនគ្រឿងផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។