រដ្ឋមន្រ្តីក្រសួងព័ត៌មាន ស្នើអ្នកកាសែតទាំងអស់ត្រូវយល់ដឹងពីក្រមសីលធម៌
ក្នុងសិក្ខាសាលាផ្សព្វផ្សាយស្ដីពី ការផ្សាយព័ត៌មានប្រកបដោយវិជ្ជាជិវៈ និងក្រមសីលធម៌ នាព្រឹកថ្ងៃទី១២ ខែកុម្ភៈនេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានមានប្រសាសន៍ថា អ្នកកាសែតទាំងអស់ចាំបាច់ត្រូវយល់ពីក្រមសីលធម៌ស្ដីពីវិជ្ជាជីវនៃអ្នកសារព័ត៌មានឲ្យបានត្រឹមត្រូវ និងច្បាស់លាស់ ជាពិសេសគឺច្បាប់និងសិទ្ធិរបស់ខ្លួននិងអ្នកដទៃ ដើម្បីក្លាយខ្លួនជាអ្នកកាសែតដែលប្រកបទៅដោយចំណេះដឹងនិងដើម្បីអាចប្រកួតប្រជែងជាមួយអ្នកកាសែតផ្សេងៗទាំងក្នុងនិងក្រៅប្រទេស។
លោករដ្ឋមន្ត្រី បានសង្កត់ធ្ងន់ថា ការរៀបចំឲ្យមានកម្មវិធីសិក្ខាសិលានេះឡើង គឺក្នុងគោលបំណងធ្វើយ៉ាងណាពង្រឹងសមត្ថភាពរបស់អ្នកកាសែត និងចង់ឲ្យអ្នកកាសែតមានការយល់ដឹងខ្ពស់និងបង្កើនតម្លៃដើម្បីផលិតព័ត៌មានប្រកបដោយគុណភាព និងអាចជឿទុកចិត្តបាន។ លោកថា សព្វថ្ងៃនេះអ្នកកាសែតដែលវ័យក្មេង មួយផ្នែកធំគឺមានវិជ្ជាជីវៈ និងក្រមសីលធម៌ត្រឹមត្រូវ។
គួរបញ្ជាក់ថា បច្ចុប្បន្ននេះ គេតែងតែសង្កេតឃើញថា មានអ្នកសារព័ត៌មានមួយចំនួនតូច បានផ្សព្វផ្សាយនូវព័ត៌មានមិនពិត ខ្វះប្រភព គ្មានវិជ្ជាជីវៈ ដែលធ្វើឲ្យសាធារណជនមានការភ័ន្តច្រឡំ ចំពោះព័ត៌មានទាំងនេះ រហូតមានសាធារណជនខ្លះ ខឹងសម្បារចំពោះថ្នាក់ដឹកនាំ ព្រោះតែព័ត៌មានក្លែងក្លាយ គ្មានវិជ្ជាជីវៈ របស់អ្នកសារព័ត៌មានមួយចំនួនតូចជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។