ស្នងការនគរបាលខេត្តកំពង់ធំ កំពុងផ្ទុះរឿងអាស្រូវត្រីឆ្តោរស៊ីកូនឯង
នគរបាលនារីជាច្រើននាក់ដាក់ពាក្យបណ្តឹងសុំអន្តរាគមន៍ពីសម្តេចក្រឡាហោម
ក្រុមមន្រ្តីនគរបាលនារី នៃស្នងការដ្ឋាននគរបាលខេត្តកំពង់ធំ កាលពីពេលថ្មីៗនេះ បានសរសេរលិខិតមួយច្បាប់ផ្ញើទៅកាន់សម្តេចក្រឡាហោម ស ខេង រដ្ឋមន្រ្តីក្រសួងមហាផ្ទៃ ឲ្យជួយរកយុត្តិធម៌ ក្រោយពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានប្រព្រឹត្តអំពើពុំគប្បីមកលើពួកគេ។
ក្នុងលិខិតនោះបានលើកឡើងថា នៅអំឡុងឆ្នាំ២០១៨-២០១៩ ពួកគេមួយចំនួនត្រូវបានលោកឧត្តមសេនីយ៍ទោ អ៊ុក កុសល ដែលជាស្នងការបានហៅទៅជួបក្នុងបន្ទប់, ហើយពេលចូលដល់ក្នុងបន្ទប់តែពីរនាក់ លោកស្នងការក៏បានសួរនាំថា «ពាក់ស័ក្តិប៉ុន្មាន? ហើយមុខតំណែងជាអ្វីសព្វថ្ងៃ? ហើយចង់បានមុខតំណែង ឬឡើងស័ក្តិអត់? បើចង់បានចាំបងជួយ ព្រោះបងជាស្នងការ ជាប្រធានអង្គភាព ចង់ធ្វើអ្វីក៏បានដែរ ឲ្យតែអូនព្រមស្រឡាញ់បង ម្យ៉ាងទៀតបើអូនព្រមស្រឡាញ់បង កុំបារម្ភខ្លាចមានកូនអី ព្រោះទឹកកាមបងគ្មានមេជីវិតបង្កកំណើតទេ» ។ ការពោលពាក្យទាំងនេះ បានធ្វើឲ្យមន្រ្តីនគរបាលជានារីហួសចិត្តនឹកស្មានថា គាត់ហ៊ាននិយាយពាក្យសម្តីបែបនេះមកលើកូនចៅជានារីភេទនោះទេ ហើយនគរបាលជានារីខ្លះមានទាំងប្តី ទាំងកូនទៀតផង។
ក្រៅពីប្រើពាក្យសម្តីលួងលោមហើយ លោកស្នងការរូបនេះ ក៏បានចាប់បង្ខំ ស្ទាបអង្អែលកេរ្តិ៍ខ្មាស់ដោយមិនញញើត ទោះបីពេលខ្លះពួកនាងខំរើបម្រះ ឬចង់ស្រែកប្រាប់គេឯងក៏មិនហ៊ាន ព្រោះខ្លាចអំណាចលោកស្នងការ ម្យ៉ាងទៀតគាត់បានគំរាមមិនឲ្យប្រាប់រឿងដែលគាត់បានប្រព្រឹត្តនោះឲ្យអ្នកណាដឹងទេ បើហ៊ានគឺមានបញ្ហាហើយ។
ក្រៅពីប្រព្រឹត្តអំពើដែលសង្គមស្អប់ខ្ពើម នូវពាក្យ «ត្រីឆ្តោរស៊ីកូនឯង» លោក អ៊ុក កុសល ក៏បានដឹកនាំបង្កើតបក្ខពួក ខ្សែស្រឡាយពុករលួយ និងអុចអាលឲ្យមានការបែកបាក់សាមគ្គីផ្ទៃក្នុង ទាំងថ្នាក់ដឹកនាំស្នងការ ក៏ដូចជាមន្រ្តីក្រោមឱវាទដែលមិនអាចស្តារកិត្តិយសបានឡើយ។
ចំពោះករណីនេះ លោកឧត្តមសេនីយ៍ទោ អ៊ុក កុសល យើងមិនអាចសុំការបំភ្លឺបានឡើយ ដោយទូរស័ព្ទរបស់លោកពុំមានអ្នកទទួល។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។