សាច់មាន់ខូចគុណភាពជិត ៤០០គីឡូក្រាម ត្រូវសមត្ថកិច្ចបង្ក្រាបបាន នៅក្រុងប៉ោយប៉ែត
បន្ទាយមានជ័យ៖ សាច់មាន់គ្មានច្បាប់ និងខូចគុណភាពជិត ៤០០គីឡូក្រាម ដែលឈ្មួញលួចដឹកតាមរ៉ឺម៉ក ត្រូវបានកម្លាំងមន្ត្រីជំនាញបង្ក្រាបបាន កាលពីថ្ងៃទី១០ ខែវិច្ឆិកា ឆ្នាំ២០២០ នៅតាមបណ្តោយផ្លូវជាតិលេខ៥៨ ស្ថិតភូមិអូរនាង សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
ករណីនេះ មន្ត្រីជំនាញ បានធ្វើការស្រាវជ្រាវតាមវិធានការជំនាញ និងបានកំណត់មុខសញ្ញាឈានដល់ឃាត់បានម៉ូតូសណ្តោងរ៉ឺម៉ក១គ្រឿង នៅចំណុចាខាងលើ ដោយរកឃើញមានផ្ទុកសាច់មាន់ជាច្រើនស្បោង ស្មើនឹងទម្ងន់ ៣៥០គីឡូក្រាម ដែលឈ្មួញដឹកបង្កប់លួចនាំចូលតាមច្រករបៀងអូរបីជាន់ ស្ថិតឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដើម្បីចែកចាយ។
សូមបញ្ជាក់ថា សាច់មាន់ដែលត្រូវបង្ក្រាបនោះ មានទម្ងន់៣៥០គីឡូក្រាម ជាសាច់មាន់ដឹកជញ្ជូនខុសច្បាប់ និងខូចគុណភាព ត្រូវបានមន្ត្រីជំនាញ យកទៅធ្វើការដុតកម្ទេចចោលផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។