រុស្ស៊ី នឹងចាក់វ៉ាក់សាំងកូវីដ១៩ ជាលក្ខណៈទ្រង់ទ្រាយធំ ជូនប្រជាជនរបស់ខ្លួន នៅសប្តាហ៍ក្រោយ
រុស្ស៊ី៖ សារព័ត៌មាន RT ចុះផ្សាយនៅថ្ងៃទី០២ ខែធ្នូនេះថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចេញបញ្ជាចាប់ផ្តើមការចាក់វ៉ាក់សាំង COVID-19 ក្នុងចំណោមប្រជាជនរុស្ស៊ីជាលក្ខណៈទ្រង់ទ្រាយធំនាសប្តាហ៍ក្រោយនេះ។
នៅក្នុងសន្និសីទវីដេអូមួយនៅថ្ងៃពុធនេះ លោក ពូទីន បានប្រាប់ឧបនាយករដ្ឋមន្ត្រីរុស្ស៊ីលោកស្រី Tatiana Golikova ដែលទទួលបន្ទុកលើកិច្ចការប្រយុទ្ធប្រឆាំងនឹង Covid-19 របស់រុស្ស៊ីថា ខ្ញុំបានស្នើអោយរៀបចំដំណើរការចាក់សាំងជាលក្ខណៈទ្រង់ទ្រាយធំ ដោយត្រូវចាប់ផ្តើមនៅចុងសប្តាហ៍ក្រោយ។ ជាការឆ្លើយតប លោកស្រីសន្យាថា នឹងរាយការណ៍ជូនលោក ពូទីន វិញ នៅពេលរដ្ឋាភិបាលបំពេញកិច្ចការងារនេះចប់សព្វគ្រប់។
លោក ពូទីន បានគូសបញ្ជាក់ទៀតថា វ៉ាក់សាំង Sputnik V ប្រមាណ២លានដូស បានត្រៀមរួចរាល់ហើយ ឬនឹងត្រូវផលិតនៅក្នុងប៉ុន្មានថ្ងៃខាងមុខនេះ ដែលអនុញ្ញាតឲ្យវេជ្ជបណ្ឌិត និងគ្រូជនជាតិរុស្ស៊ី អាចទទួលបានការចាក់វ៉ាក់សាំងចំនួន២ដូសភ្លាមៗបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។