ទិន្នផលស្រូវវស្សាឆ្នាំនេះ កម្ពុជានឹងទទួលបានប្រមាណ ៨,៥៩លានតោន
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានព្យាករណ៍បឋមនៃទិន្នផលផលស្រូវវស្សាឆ្នាំ ២០២០នេះ នឹងអាចទទួលបានក្នុងប្រមាណ ៨,៥៩លានតោន បានកើនឡើងប្រមាណ ៤ភាគរយ បើធៀបនឹងកាលពីឆ្នាំមុន ដែលទទួលបានប្រមាណ ៨,២៦លានតោន។
លទ្ធផលនេះ ត្រូវបានក្រសួងកសិកម្មកំណត់ទិន្នផលស្រូវវស្សាជាមធ្យមក្នុងឆ្នាំ២០២០ មានចំនួន ៣១២២គីឡូក្រាម ក្នុងមួយហិកតា ច្រើនជាង ឆ្នាំ២០១៩ ដែលទទួលបានចំនួន ៣០៩៥គីឡូក្រាម ក្នុងមួយហិកតា។
យោងតាមរបាយការណ៍របស់ក្រសួងកសិកម្មបានបង្ហាញថា គិតត្រឹមថ្ងៃទី ៧ខែធ្នូ ឆ្នាំ ២០២០នេះ នៅទូទាំងប្រទេសការប្រមូលផលស្រូវវស្សាសម្រេចបាន ជាង ១,៧៨លានហិកតា ស្មើនឹង ៦៤,១០% ដែលទទួលបានបរិមាណផលសរុប ៥,៦៥លានតោន។
របាយការណ៍ដដែលនេះឲ្យដឹងទៀតថា ខេត្តដែលសម្រេចបានចាប់ពី ៩០% ឡើងមាន ខេត្តកោះកុង ក្រចេះ រតនគីរី និងខេត្តស្ទឹង ត្រែង។ ចំណែកខេត្តដែលសម្រេចបានចាប់ពី ៧០% ទៅ ៨០% មាន ខេត្តកំពត ពោធិ៍សាត់ សៀមរាប ស្វាយរៀង និងខេត្តឧត្តរមានជ័យ ខណៈខេត្តដែលសម្រេចបានចាប់ពី ៥០% ទៅ ៦០% មាន ខេត្តបន្ទាយមានជ័យ កំពង់ចាម កំពង់ឆ្នាំង កណ្តាល មណ្ឌលគីរី ភ្នំពេញ ព្រះវិហារ ព្រៃវែង តាកែវ កែប ប៉ៃលិន និងខេត្តត្បូងឃ្មុំ។ដោយឡែកខេត្តដែលសម្រេចបានក្រោម ៥០% មាន ខេត្តបាត់ដំបង កំពង់ស្ពឺ និងខេត្តកំពង់ធំ និងខេត្តព្រះសីហនុសកម្មភាពប្រមូលផលស្រូវវស្សាទើបតែសម្រេចបានជាង ២០% ប៉ុណ្ណោះ។
យោងតាមរបាយការណ៍ក្រសួងកសិកម្ម កាលពីឆ្នាំមុន កម្ពុជា ប្រមូលផលស្រូវទាំងរដូវវស្សា និងប្រាំង បានប្រមាណ ១០,៨លានតោន និងនៅសល់ស្រូវប្រមាណ ៥,៧៦លានតោនសម្រាប់កែច្នៃជាអង្ករនាំចេញ។ ប៉ុន្តែដោយបញ្ហាកង្វះលទ្ធភាពក្នុងការនាំចេញជាអង្ករ កម្ពុជា បាននាំចេញស្រូវប្រមាណ ២លានតោន ទៅកាន់ប្រទេសវៀតណាម កាលពីឆ្នាំ ២០១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។