អាជ្ញាធរ បន្តចុះរៀបចំសណ្តាប់ធ្នាប់ នៅតាមផ្លូវជុំវិញផ្សារលើ ក្រុងព្រះសីហនុ
ខេត្តព្រះសីហនុ៖ នៅព្រឹកថ្ងៃ១៤ ខែធ្នូ ឆ្នាំ២០២០នេះ កម្លាំងអាជ្ញាធរ បានបន្តចុះរៀបចំសណ្តាប់ធ្នាប់ នៅតាមផ្លូវជុំវិញផ្សារលើក្រុងព្រះសីហនុ។
សមត្ថកិច្ច បានឲ្យដឹងថា មានយានយន្ត និងសម្ភារៈមួយចំនួន ត្រូវបានចាប់យកទៅរក្សាទុកជាបណ្តោះអាសន្ន ជាការដាក់ពិនយ័ដល់ម្ចាស់ដែលចតឬលក់ដូរប៉ះពាល់ចំណីផ្លូវ។
លោក អ៊ី សុខឡេង អភិបាលក្រុងព្រះសីហនុ បានឲ្យដឹងដែរថា បច្ចុប្បន្ននេះ ការរៀបចំណ្តាប់ធ្នាប់នៅតាមផ្លូវផ្សារឃ្លាំងលើនិងខាងមុខរោងចក្រញូស្តារ ក្នុងសង្កាត់លេខ១ ទទួលបានលទ្ធផលល្អហើយ ក្រោយមានកិច្ចសហការពីពលរដ្ឋ ហើយការរៀបចំសណ្តាប់ធ្នាប់ដូចគ្នានេះនឹងធ្វើជាបន្តបន្ទាប់ តាមគោលដៅសំខាន់ៗក្នុងក្រុង។
លោក បញ្ជាក់ថា ជម្រើសចាប់យកយានយន្តឬសម្ភារៈផ្សេងៗ គឺជាជម្រើសចុងក្រោយរបស់អាជ្ញាធរ ក្នុងករណីពលរដ្ឋម្ចាស់យានយន្តនិងម្ចាស់របស់មិនសហការ ក្នុងនោះលោកអភិបាលក្រុងសង្ឃឹមថា នៅជុំវិញផ្សារលើ និងតំបន់ប្រជុំជនមួយចំនួនទៀត ពលរដ្ឋនឹងចូលរួមសហការ ដើម្បីទីក្រុងមានសណ្តាប់ធ្នាប់ល្អនិងមានសោភណ្ឌ័ភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។