ប្រទេសជាច្រើន ចាប់ផ្តើមអនុម័តឲ្យប្រើប្រាស់វ៉ាក់សាំងប្រឆាំងកូវីដ១៩ជាបន្ទាន់
បន្ទាប់ពី រុស្ស៊ី អង់គ្លេស កាណាដា អាមេរិក… ពេលនេះប្រទេស គូវែត ក៏បានអនុម័តឲ្យប្រើជាបន្ទាន់ នូវវ៉ាក់សាំងកូវីដ-១៩ របស់ក្រុមហ៊ុនPfizer-BioNtech ។ កន្លងក ខណៈប្រទេសអារ៉ាប់រួម និងបារ៉ែនក៏បាន អនុម័តឲ្យប្រើវ៉ាក់សាំងរបស់ក្រុមហ៊ុនចិន Sinopharm ផងដែរ។
នៅថ្ងៃទី១៣ខែធ្នូ ក្រសួងសុខាភិបាលនៃប្រទេសគូវ៉ែត សម្រេចអនុម័តឲ្យប្រើជាបន្ទាន់ នូវវ៉ាក់សាំង COVID-19 របស់ក្រុមហ៊ុន Pfizer-BioNtech ។ តាមទីភ្នាក់ងារព័ត៌មានរដ្ឋគូវ៉ែត KUNA បានប្រកាសថា នៅថ្ងៃ១៣ខែធ្នូថា ក្រសួងសុខាភិបាលនៃប្រទេសសម្បូរប្រេងមួយនេះ បានអនុញ្ញាតឲ្យប្រើប្រាស់ជាបន្ទាន់ នូវវ៉ាក់សាំងរបស់ក្រុមហ៊ុន Pfizer។ ក្រសួងបានផ្តល់ជម្រើសដល់ប្រជាពលរដ្ឋ ក្នុងការចុះឈ្មោះជាមុន ដើម្បីទទួលវ៉ាក់សាំង នៅលើគេហទំព័ររបស់ខ្លួន។
ប្រទេសឈូងសមុទ្រអារ៉ាប់ពីរទៀត គឺប្រទេសអារ៉ាប់រួម និងបារ៉ែន បានក៏បានអនុម័តឲ្យប្រើប្រាស់ វ៉ាក់សាំងប្រឆាំង COVID-19 របស់ក្រុមហ៊ុនចិន Sinopharm ផងដែរ។ ហើយការសម្រេចទទួលស្គាល់ និងអនុញ្ញាតឲ្យប្រើប្រាស់នេះ ធ្វើឡើងបន្ទាប់ពីលទ្ធផលនៃការតេស្តដំណាក់កាលចុងក្រោយ លើវ៉ាក់សាំងមួយនេះ បានបង្ហាញថា មានប្រសិទ្ធភាពរហូតដល់ ៨៦%។
ចំណែកនៅអាមេរិកវិញ រថយន្តកុងតឺន័រ ដឹកវ៉ាក់សាំងកូវីដ-១៩ របស់ក្រុមហ៊ុន Pfizer/BioNTech ចាប់ផ្តើមដឹកចេញពីរោងចក្រផលិត នៅរដ្ឋ Michigan ហើយ ដើម្បីចែកចាយទៅកាន់រដ្ឋផ្សេងៗ។
ក្នុងដំណាក់កាលដំបូង វ៉ាក់សាំងចំនួន ៣លានដូស ត្រូវបានគេរំពឹងថានឹងត្រូវចែកចាយនៅទូទាំងសហរដ្ឋអាមេរិក។ ប៉ុន្តែគេមិនទាន់ដឹងច្បាស់ នៅឡើយទេថាតើនរណានឹងទទួលការចាក់វ៉ាក់សាំងមុនគេ ខណៈបុគ្គលិកសុខាភិបាល, អ្នកនៅជួរមុខប្រយុទ្ធជាមួយ COVID-19 និងមនុស្សងាយរងគ្រោះ ត្រូវបានគេជឿជាក់ថានឹងទទួលការចាក់វ៉ាក់សាំងជាអាទិភាព។
បើតាមក្រុមមន្ត្រីអាមេរិក ការដឹកជញ្ជូនវ៉ាក់សាំងនឹងត្រូវធ្វើជាដំណាក់កាល ដោយក្នុងដំណាក់កាលដំបូងនេះ នឹងទៅដល់មណ្ឌលចែកចាយចំនួន ១៤៥កន្លែងនៅចន្ទស្អែកនេះ ហើយគោលដៅចំនួន៤២៥កន្លែងផ្សេងទៀត នឹងទទួលបានវ៉ាក់សាំងនៅថ្ងៃអង្គារ និង៦៦កន្លែងទៀតគឺនឹងទទួលបាន វ៉ាក់សាំងនៅថ្ងៃពុធ។
គួរបញ្ជាក់ថា សកម្មភាពនេះ ត្រូវបានគេចាត់ទុកថាជា ជំហានដ៏សំខាន់ ក្នុងការទប់ស្កាត់ជំងឺ COVID-19 នៅសហរដ្ឋអាមេរិក ដែលរហូតមកទល់ពេលនេះ វាបានសម្លាប់ប្រជាជនអាមេរិកប្រមាណជាង ៣០មុឺននាក់មកហើយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។