កូវីដ១៩ ៖ អ្នកឆ្លងលើពិភពលោកជិតដល់៧៤លាននាក់, ស្លាប់ជាង ១.៦៤លាននាក់, ជាសះស្បើយជិត ៥២លាននាក់
ដោយការឆ្លងរាលដាល លើពិភពលោកកាន់តែខ្លាំងប្រទេសជាច្រើន កំពុងត្រៀមអនុម័តឲ្យចាក់វ៉ាក់សាំងប្រឆាំងកូវីដ១៩ ជាបន្ទាន់ ក្រោយពេលមានប្រទេសជាច្រើន បានចាក់ជូនពលរដ្ឋរបស់ខ្លួន។
គិតត្រឹមម៉ោង ៧យប់ ថ្ងៃ ទី១៦ ខែធ្នូ ឆ្នាំ២០២០ តាមទិន្នន័យពីគេហទំព័រអន្តរជាតិ worldmeter បានបង្ហាញថា ជំងឺរាតត្បាតដ៏កាចសាហាវមួយនេះ វាបានចម្លងទៅមនុស្សសរុបចំនួន ៧៣,៩៣០,៤៥៦នាក់ ដែលក្នុងនោះអ្នកជំងឺចំនួន ១,៦៤៤,៥៧៨នាក់បានស្លាប់បាត់បង់ជីវិត និង ៥១,៩៤៣,៤៨៤នាក់ផ្សេងទៀត ត្រូវបានព្យាបាលឲ្យជាសះស្បើយឡើងវិញ នៅទូទាំងសកលលោក។
ជាមួយគ្នានេះប្រទេសជាច្រើនក៏បានអនុម័តប្រើប្រាស់វ៉ាក់សាំងជាបន្ទាន់ផងដែរ ដើម្បីទប់ស្កាត់ការឆ្លងកាន់តែច្រើន។ កាលពីថ្ងៃទី១៥ខែធ្នូរដ្ឋមន្ត្រីក្រសួងសុខាភិបាលអាល្លឺម៉ង់បានប្រកាសឲ្យដឹងថា នឹងចាប់ផ្តើមចាក់វ៉ាក់សាំង ប្រឆាំងកូវីដ១៩ របស់BioNTech/Pfizer ក្រោយពេលសហគមន៍អឺរ៉ុបអនុម័តឲ្យប្រើប្រាស់។ តាមគម្រោងការចាក់វ៉ាក់សាំងនឹងចាប់ផ្តើមនៅបុណ្យគ្រិស្តស្មាស់។
នាយកដ្ឋានគ្រប់គ្រងឱសថអឺរ៉ុប(EMA) នឹងជួបប្រជុំគ្នាដើម្បីអនុម័តឲ្យប្រើប្រាស់វ៉ាក់សាំង នាថ្ងៃទី២១ខែធ្នូ គឺមុនការគ្រោងទុក ៨ថ្ងៃ។ កន្លងមកអឺរ៉ុបមានគម្រោងជួបប្រជុំអនុម័តនៅថ្ងៃទី២៩ខែធ្នូឆ្នាំ២០២០។ បច្ចុប្បន្នវ៉ាក់សាំងរបស់ក្រុមហ៊ុន អាមេរិក-អាល្លឺម៉ង់ BioNTech/Pfizer ទទួលបានការអនុម័តឲ្យប្រើប្រាស់នៅក្នុងប្រទេសជាច្រើន ដូចជា អាមេរិក អង់គ្លេស ម៉ិចស៊ីកូ កាណាដា សិង្ហបុរី បារ៉ែន និងអារ៉ាប៊ី សាអូឌីន ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។