ក្រសួងបរិស្ថាន ព្រមានចាត់វិធានការចំពោះអ្នកជួញដូរដើមកេសរកូលព្រៃ ឬផ្កាអ័រគីដេរ
ខេត្តសៀមរាប៖ ឯកឧត្ដម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន មានប្រសាសន៍ថា កេសរកូលព្រៃ គឺជាធនធានធម្មជាតិដ៏កម្រ និងជាកម្មសិទ្ធិរបស់កម្ពុជា ដែលចាំបាច់ត្រូវថែរក្សាការពារនិងអភិរក្ស ដូច្នេះបើមានការប្រមូលឬធ្វើអាជីវកម្មកេសរកូលព្រៃ វាអាចធ្វើឲ្យបាត់បង់នូវប្រភេទកេសរកូលកម្ពុជា ដោយសារយកទៅធ្វើអាជីវកម្មនៅប្រទេសផ្សេង ឬធ្វើជាកម្មសិទ្ធិរបស់គេ ហេតុនេះក្រសួងចាំបាច់ត្រូវទប់ស្កាត់ការជួញដូរដោយខុសច្បាប់ ខណៈដែលក្រសួងបរិស្ថាន ធ្លាប់បានធ្វើការព្រមានរួចហើយ ចំពោះអ្នកណាដែលធ្វើអាជីវកម្មលើដើមកេសរកូលព្រៃ ឬដើមផ្កាអ័រគីដេរ ដែលហួសប្រមាណ ហើយឈានទៅដល់កម្រិតបំផ្លិចបំផ្លាញនោះ ក្រសួងនឹងចាត់វិធានការតាមផ្លូវច្បាប់ ដោយមិនយោគយល់ចំពោះពួកគាត់ឡើយ។
ឯកឧត្ដម នេត្រ ភក្ត្រា មានប្រសាសន៍យ៉ាងដូច្នេះ ក្នុងឱកាសប្រាប់ក្រុមអ្នកសារព័ត៌មានក្នុងដំណើរទស្សនកិច្ចទៅកាន់មជ្ឈមណ្ឌលស្រាវជ្រាវ និងអភិរក្សកេសរកូលសុខអានភ្នំគូលែន ស្ថិតនៅខាងលិចជើងភ្នំគូលែន ក្នុងស្រុកបន្ទាយស្រី ខេត្ដសៀមរាប ។
ឯកឧត្ដម នេត្រ ភក្ត្រា មានប្រសាសន៍បន្ថែមថា កន្លងមកមានជនខិលខូចមួយចំនួន បានធ្វើការបំផុសព័ត៌មានក្នុងបណ្តាញសង្គមអំពីការប្រមូលទិញប្រភេទកេសរកូលព្រៃក្នុងតម្លៃខ្ពស់ ដែលជាហេតុនាំឲ្យមានការប្រមូលទិញកេសរកូលព្រៃ ពីតំបន់ការពារធម្មជាតិដោយអនាធិបតេយ្យ ដែលទង្វើនេះ បានធ្វើឲ្យប៉ះពាល់ដល់ប្រភេទកេសរកូលព្រៃ និងអាចឈានដល់ការផុតពូជទាំងស្រុងនូវប្រភេទកេសរកូលព្រៃមួយចំនួន ដូច្នេះតាមរយៈនេះ សូមអំពាវដល់ប្រជាពលរដ្ឋ កុំឱ្យចាញ់បោកក្រុមឈ្មួញដែលញុះញង់ឲ្យបោចផ្កាកេសរកូលពីក្នុងព្រៃ ដើម្បីលក់ឲ្យឈ្មួញទោះក្នុងតម្លៃណាក៏ដោយ ហើយត្រូវមកចូលរួមអភិរក្សផ្កាកែសរកូលព្រៃ ឲ្យបានគង់វង្សនៅកម្ពុជាវិញ ខណៈបច្ចុប្បន្ននេះ ក្រសួងបរិស្ថាន បាននឹងកំពុងធ្វើការកំណត់អត្តសញ្ញាណប្រភេទកេសរកូលព្រៃដែលកំពុងអភិរក្សនៅមជ្ឍមណ្ឌលស្រាវជ្រាវ “សុខអានកេសរកូល” ដើម្បីរៀបចំជាប្រកាសការពារ តាមអនុសញ្ញាសហប្រជាជាតិស្តីពីជីវៈចម្រុះ(UN-CBD)ស្តីពីការអភិរក្សក្នុងតំបន់ ដើម្បីធានាបាននូវការប្រើប្រាស់ធនធានជីវៈចម្រុះប្រកបដោយនិរន្តរភាព ។
សូមបញ្ជាក់ថា ច្បាប់ស្តីពីតំបន់ការពារធម្មជាតិ មាត្រា៥៩ ត្រង់ចំណុច៣និង៤បានចែងថា ដឹកជញ្ជូននិងប្រមូលផលអនុផលធនធានធម្មជាតិដោយគ្មានការអនុញ្ញាតនិងប្រមូលសន្និធិផលអនុផលធនធានធម្មជាតិដោយគ្មានការអនុញ្ញាត នឹងត្រូវទទួលការពិន័យអន្តរការណ៍ជាប្រាក់ពី១លានរៀល(១.០០០.០០០រៀល) ដល់១០លានរៀល ឬត្រូវធ្វើការជួសជុលស្តារការខូចខាត និងរឹបអូសវត្ថុតាងជាសម្បត្តិរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។