ក្រសួងសុខាភិបាល ប្រកាសឲ្យបងប្អូនប្រជាពលរដ្ឋប្រុងប្រយ័ត្នចំពោះជំងឺផ្ដាសាយជ្រូក
នាយកដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាល កាលពីពេលថ្មីៗនេះ បានប្រកាសដល់បងប្អូនប្រជាពលរដ្ឋទាំងអស់ សូមប្រុងប្រយ័ត្នខ្ពស់អំពីជំងឺផ្តាសាយជ្រូកដែលអាចនឹងកើតមាននៅក្នុងរដូវវស្សានេះ។
នាយកដ្ឋានប្រយុទ្ធនឹងជំងឺឆ្លងបានឲ្យដឹងថា នាពេលថ្មីៗនេះ ប្រទេសជិតខាងយើងមានការប្រកាសពីការរីករាលដាលជំងឺផ្តាសាយធំ H1N1 (ដែលកាលពីឆ្នាំ២០០៩ ហៅថាផ្តាសាយជ្រូក តែមេរោគផ្តាសាយនេះបានបំលែងខ្លួនទៅជាផ្តាសាយធំធម្មតាកាលពីឆ្នាំ ២០១២ម្លេះ) ដែលបណ្តាលឲ្យឈឺ និងស្លាប់ជាច្រើនករណី ។
ចំពោះប្រទេសយើងវិញ នាយកដ្ឋានប្រយុទ្ធនឹងជំងឺឆ្លងក៏ទទួលបានរបាយការណ៏ពីការកើនឡើងនៃជំងឺផ្តាសាយធំ ដែលក្នុងនោះក៏មានឃើញវិជ្ជមាន មេរោគផ្តាសាយ H1N1 ផងដែរ តាមរយៈប្រព័ន្ទតាមដានជំងឺផ្តាសាយ តែពុំទាន់រកឃើញករណីធ្ងន់ធ្ងរនៅឡើយទេ តែទោះជាយ៉ាងណា សូមបងប្អូនចូលរួមប្រុងប្រយ័ត្នបង្ការការឆ្លងជំងឺផ្តាសាយធំនេះ ។
តាមការសិក្សាស្រាវជ្រាវរបស់នាយកដ្ឋានប្រយុទ្ធនឹងជំងឺឆ្លងរកឃើញថា ក្នុងប្រទេសយើងនៅក្នុងរដូវភ្លៀងជារដូវដែលមានឆ្លងជំងឺផ្តាសាយធំច្រើន ដែលបង្កឡើងដោយមេរោគផ្តាសាយច្រើនប្រភេទ ដូច្នេះសូមបងប្អូនទាំងអស់មានការប្រុងប្រយ័ត្នខ្ពស់ដើម្បីកុំឲ្យចំលងជំងឺផ្តាសាយធំនេះ ។
នាយកដ្ឋានប្រយុទ្ធនឹងជំងឺឆ្លង បានបញ្ជាក់ថា ក្រុមអ្នកជំងឺដែលមានជំងឺផ្តាយសាយធំអាចវិវត្តន៏ទៅជំងឺធ្ងន់ធ្ងររួមមាន កុមារអាយុក្រោម៥ឆ្នាំ មនុស្សចាស់លើសពី៦៥ឆ្នាំ ស្រ្តីមានផ្ទៃពោះ និងអ្នកមានជំងឺរ៉ាំរ៉ៃ ។
ដូច្នេះ សម្រាប់ការបង្ការជំងឺផ្តាសាយធំរួមមាន៖ ឧស្សាហ៏លាងដៃជាមួយសាប៊ូនិងទឹក លាងជាមួយអាល់កុល ឬថ្នាំហ្សែល នៅឆ្ងាយពីអ្នកជំងឺផ្តាសាយលើសពី១ម៉ែត្រ ឲ្យអ្នកជំងឺផ្តាសាយពាក់ម៉ាស់ និងលាងដៃសាប៊ូនិងទឹកដែរ ។
រោគសញ្ញាជំងឺផ្តាសាយធំរួមមាន: គ្រុនក្តៅលើសពី ៣៨.៥អង្សាសេ និងមានក្អក ឫឈឺក និងករណីខ្លះអាចវិវត្តន៏ទៅហត់ ។
សម្រាប់ការព្យាបាលវិញគឺ: ប្រើថ្នាំបញ្ចុះកំដៅ ផឹកទឹកឲ្យបានច្រើន គេងលក់ស្កប់ស្កល់ កាត់បន្ថយការហាត់ប្រាណ ហូបអាហារសំបូរជីវជាតិជាពិសេស វីតាមីនសេ ការប្រើថ្នាំផ្សះគ្មានប្រសិទ្ធិភាព សំលាប់មេរោគនេះទេ ថែមទាំងសុខភាពទ្រុឌទ្រោម និងមិនងាយជាពីជំងឺផ្តាយទៀតផង ។ បើការព្យាបាល៣ថ្ងៃមិនធូរស្រាល ឫវិវត្តន៏ទៅជាហត់ខ្លាំង សូមអញ្ជើញទៅពិគ្រោះជំងឺជាមួយគ្រូពេទ្យ យើងមានឱសថសំរាប់ព្យាបាលសំលាប់មេរោគផ្តាសាយធំ ។
បើបងប្អូនឃើញរោគសញ្ញាគ្រុនក្តៅច្រើន ឬផ្តាសាយច្រើន ក្នុងភូមិ ក្នុងសាលា ឬកន្លែងធ្វើការ សូមទាក់ទងលេខ 115 ដោយមិនគិតថ្លៃពីគ្រប់ប្រព័ន្ទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។