ពលរដ្ឋខ្មែរ១៦នាក់ ត្រូវស្ថានទូតកម្ពុជាជួយអន្តរាគមន៍ត្រឡប់មកប្រទេសវិញ
យោងតាមអ្នកនាំពាក្យក្រសួងការបរទេសកម្ពុជាបានឲ្យដឹងថា ពលរដ្ឋខ្មែរចំនួន១៦នាក់ ត្រូវបានស្ថានតំណាងកម្ពុជាប្រចាំប្រទេសចិន វៀតណាម ថៃ និងអារ៉ាប៊ីសាអូឌីត ជួយអន្តរាគមន៍ឲ្យបានវិលត្រឡប់មកកាន់ប្រទេសកម្ពុជាវិញជាបន្តបន្ទាប់កាលពីដើមខែកក្កដានេះ។
ក្នុងនោះស្ថានទូតកម្ពុជាប្រចាំប្រទេសចិន បានសហការជាមួយអាជ្ញាធរមានសមត្ថកិច្ចចិន ជួយសង្រ្គោះស្រ្តីខ្មែរចំនួន៧នាក់ ដែលមកពីខេត្តកំពង់ចាម កំពង់ឆ្នាំង ក្រចេះ តាកែវ បាត់ដំបង និងរាជធានីភ្នំពេញ ដែលត្រូវបានមេខ្យល់បោកបញ្ឆោតនាំទៅរៀបការដោយខុសច្បាប់នៅ ក្នុងប្រទេសចិន។ ពួកគេត្រូវបានបញ្ជូនមកដល់ប្រទេសកម្ពុជាវិញកាលពីថ្ងៃទី៤ និងថ្ងៃទី៥ ខែកក្កដា ឆ្នាំ២០១៨។
ដោយឡែកស្ថានឯកអគ្គរាជទូតកម្ពុជាប្រចាំប្រទេសវៀតណាម បានរៀបចំមាតុភូមិនិវត្តន៍ស្រ្តីខ្មែរចំនួន៤នាក់ ដែលមេខ្យល់បោកបញ្ឆោតបម្រុងយកទៅរៀបការជាមួយបុរសជនជាតិចិន នៅប្រទេសចិន។ ស្រ្តីរងគ្រោះទាំងនោះមកពីខេត្តកណ្តាល កំពង់ចាម និងត្បូងឃ្មុំ ត្រូវបានមេខ្យល់នាំធ្វើដំណើរពីកម្ពុជាទៅដល់វៀតណាមនៅចុងខែមិថុនា ហើយបម្រុងបន្តដំណើរឆ្លងកាត់ព្រំដែនទៅប្រទេសចិន តែត្រូវបានអាជ្ញាធរមានសមត្ថកិច្ចវៀតណាមជួយសង្រ្គោះទាន់។
ចំណែកស្ថានឯកអគ្គរាជទូតកម្ពុជាប្រចាំប្រទេសថៃ បានសហការជាមួយអាជ្ញាធរថៃ រៀបចំមាតុភូមិនិវត្តន៍អនីតិជនខ្មែរចំនួន៣នាក់ មានអាយុពី១៣ ដល់១៦ឆ្នាំ មកពីខេត្តបន្ទាយមានជ័យ ដែលទទួលរងគ្រោះដោយការជួញដូរមនុស្សតាមច្រកអន្តរជាតិប៉ោយប៉ែត។
ស្ថានឯកអគ្គរាជទូតកម្ពុជាប្រចាំសាធារណរដ្ឋអារ៉ាប់អេហ្ស៊ីប បានសម្របសម្រួលជួយរៀបចំមាតុភូមិនិវត្តន៍ របស់ស្រ្តីបម្រើការជាមេផ្ទះខ្មែរ១នាក់ ដែលពុំអាចទ្រាំទ្រការងារនៅអារ៉ាប៊ីសាអូឌីត មកដល់កម្ពុជាវិញនៅព្រឹកថ្ងៃទី៤ កក្កដា ឆ្នាំ២០១៨។
រីឯស្ថានអគ្គកុងស៊ុលកម្ពុជាប្រចាំទីក្រុងស៊ីអាន ប្រទេសចិន បានធ្វើអន្តរាគមន៍ និងរៀបចំមាតុភូមិនិវត្តន៍ស្រ្តីខ្មែរ១នាក់ ដែលចាញ់បោកមេខ្យល់ និងត្រូវបានអាជ្ញាធរចិនឃាត់ខ្លួនពីបទ រស់នៅដោយខុសច្បាប់, ស្រ្តីរងគ្រោះបានមកដល់កម្ពុជាវិញនៅថ្ងៃទី៣ ខែកក្កដា ឆ្នាំ២០១៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។