កម្ពុជា ដំណើរការត្រួតពិនិត្យចម្ការស្វាយ និងរោងចក្រប្រព្រឹត្តកម្មពងរុយ ក្នុងផ្លែស្វាយ មុននាំកាន់ទីផ្សារប្រទេសចិន
ភ្នំពេញ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា លទ្ធផលនៃការវាយតម្លៃរួមគ្នារបស់តំណាងអគ្គរដ្ឋបាលគយនៃសាធារដ្ឋប្រជាមានិតចិន និងក្រុមការងារអគ្គនាយកដ្ឋានកសិកម្ម កម្ពុជា មុនការអនុញ្ញាតឲ្យនាំផ្លែស្វាយស្រស់ទៅកាន់ទីផ្សារប្រទេសចិន ដូចតាមការគ្រោងទុក។
ជាក់ស្តែងកាលពីថ្ងៃទី១០ ខែមីនា ឆ្នាំ២០២១ ក្រុមការងារអគ្គនាយកដ្ឋានកសិកម្ម បានដំណើរការត្រួតពិនិត្យចម្ការស្វាយ និងរោងចក្រប្រព្រឹត្តកម្មពងរុយក្នុងផ្លែស្វាយ តាមអនឡាញជាមួយភាគីគយនៃខេត្តក្វាងស៊ី តំណាង អគ្គរដ្ឋបាលគយនៃសាធារណរដ្ឋប្រជាមានិតចិន នៅលើទីតាំងចំនួន៧ ដែលបានគ្រោងទុក។
បន្ទាប់ពីការបូកសរុបនូវលទ្ធផលនៃកិច្ចដំណើរការវាយតម្លៃ៖
ក្រុមការងារភាគីចិន សន្យានឹងផ្តល់លទ្ធផលតាមរយៈរបាយការណ៍វាយតម្លៃក្នុង រយៈពេល១សប្ដាហ៍បន្ទាប់ពីកិច្ចប្រជុំនេះ។ ក្រុមការងារអគ្គនាយកដ្ឋានកសិកម្ម នឹងខិតខំជំរុញ ឲ្យក្រុមហ៊ុនធ្វើការកែលម្អនូវចំណុចខ្វះខាត ឱ្យបានលឿនបំផុត ដើម្បីឈានទៅសម្រេចឲ្យខានតែបានក្នុងការនាំចេញផ្លែស្វាយស្រស់ទៅកាន់ប្រទេសចិន នៅក្នុងឆ្នាំនេះ។
សូមបញ្ជាក់ថា មូលហេតុចម្បងនៃការអូសបន្លាយពេលវេលា នៃការធ្វើសេចក្តីសម្រេចចិត្តក្នុងការអនុញ្ញាតឲ្យកម្ពុជានាំផ្លែស្វាយស្រស់ចេញពីកម្ពុជានោះ គឺ៖
១. ការយល់ដឹងរបស់កម្ពុជាទាក់ទងទៅនឹងការគ្រប់គ្រង អនាម័យនិងភូតគាមអនាម័យ (ទាំងការនាំចូលនិងនាំចេញផលិតផលកសិកម្ម និងទាំងការដាំដុះដំណាំ) នៅមានកម្រិត ដោយព្រះរាជាណាចក្រកម្ពុជាយើងពុំទាន់មានច្បាប់ស្តីពី អនាម័យនិងភូតគាមអនាម័យ នៅឡើយដែរ ។
២. ផ្លែស្វាយជាប្រភេទផ្លែឈើមួយដែលមានសក្តានុពល ផ្ទុកពងរុយ ដែលនឹងអាចចាប់ផ្តើមញស់ជាដង្កូវ ហើយក្លាយជាសត្វរុយ អាចទៅបំផ្លាញដំណាំនានានៅក្នុងប្រទេសនាំចូល ដែលមានភូមិសាស្ត្រស្ថិតនៅក្នុងតំបន់ មានស្ថានភាពនៃអាកាសធាតុ និងបរិស្ថាន ប្រហាក់ប្រហែលគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។