សាលាខេត្តស្វាយរៀង បំភ្លឺរឿងលួចកាប់ដើមធ្នង់ នៅសាលាខេត្តតម្លៃប្រមាណជិត១លានដុល្លារ ដោយមិនដឹង
ស្វាយរៀង៖ ក្រោយបែកធ្លាយរឿងអាស្រូវ បាត់ដើមធ្នង់មួយតម្លៃប្រមាណជិត១លានដុល្លារនៅក្នុងបរិវេនសាលាខេត្តស្វាយរៀង គ្មានអ្នកដឹង។ លោកងួន ខាន់ មន្ត្រីសាលាខេត្តស្វាយរៀង និងជាជំនួយការអភិបាលខេត្តស្វាយរៀង បានចេញមកបកស្រាយថា ដើមធ្នង់នោះមិនមានជនណាលួចកាប់ទៅរួចនោះទេ ពោលគឺអាជ្ញាធរជាអ្នកកាប់ដើម្បីការពារសុវត្ថិភាព ព្រោះវាងាប់ និងពុក ខ្លាចក្រែងបង្កគ្រោះថ្នាក់ជាយថាហេតុ។
លោកបានបន្ថែមថា “ពិតជាមានករណីកាប់ដើមធ្នុងនោះមែន ព្រោះដើមឈើនេះវាងាប់ និងពុកខ្លាចក្រែងបាក់ធ្លាក់សង្កត់មនុស្ស និងរថយន្តដែលទុកក្រោមដើមឈើនេះ ហើយពុំបានយកទៅលក់នោះទេគឺទុកសម្រាប់ធ្វើតុនិងកៅអីដាក់សាលាខេត្តតែដើមឈើនេះវាពុកច្រើនឥឡូវជាងធ្វើបានតុពីរហើយដែរ”។
បើតាមសេចក្តីជូនដំណឹងរបស់ រដ្ឋបាលខេត្តស្វាយរៀង បានឲ្យដឹងថា សូមជម្រាបជូនសាធារណជន មេត្តាជ្រាបថា នាពេលកន្លងមកនេះដោយ យោងតាម ការស្នើសុំរបស់មន្ត្រីរាជការសាលាខេត្ត និងបានពិនិត្យឃើញថាដើមឈើ ១ដើម ជាប្រភេទដើមធ្នង់ ដែលបានដាំនៅពេលរៀបចំអគារសាលាខេត្ត (មានអាយុកាលប្រមាណជា ៥០ឆ្នាំ ទៅ៦០ឆ្នាំ មិនមែន ២០០ឆ្នាំនោះទេ) ស្ថិតក្នុងបរិវេណសាលាខេត្តស្វាយរៀង មានសភាពចាស់ ពុកផុយ និងងាប់ជ្រុះស្លឹក ដែលអាចនឹងបាក់ ឬដួលរលំ ជាពិសេសនៅពេលមានភ្លៀងធ្លាក់ និងមានខ្យល់បក់ខ្លាំង បង្កឲ្យមានផលប៉ះពាល់ ឬខូចខាតទ្រព្យសម្បត្តិនិងគ្រោះថ្នាក់ជាយថាហេតុដល់មន្ត្រីរាជការបម្រើការងារ នៅក្នុងសាលាខេត្ត ក៏ដូចជាប្រជាពលរដ្ឋមកទទួលសេវា រដ្ឋបាលខេត្តស្វាយរៀង បានសម្រេចធ្វើការកាប់ផ្ដួលដើមឈើនេះ នៅថ្ងៃទី២១ ខែកក្កដា ឆ្នាំ២០១៨ (មិនមែនថ្ងៃ ស មុនបោះឆ្នោត ១ថ្ងៃនោះទេ) គឺពុំមានចោរណាលួចចូលកាប់នោះឡើយ ។
ចំពោះ ចំណែកនៃដើមឈើនេះ ស្ទើរតែទាំងស្រុងគឺមានសភាពពុកផុយ និងប្រហោងក្នុង ពោលមានប្រមាណតែ ៤០% ប៉ុណ្ណោះ ដែលនៅអាចប្រើប្រាស់បាន ហើយរដ្ឋបាលខេត្តបានរក្សាទុកសម្រាប់កែច្នៃជាតុ កៅអី និងគ្រឿងសង្ហារឹមផ្សេងទៀតតាមការជាក់ស្ដែងបម្រើឲ្យការប្រើប្រាស់ជាប្រយោជន៍រួមនៅក្នុងសាលាខេត្ត ។
សេចក្តីដូចបានជម្រាបជូនខាងលើ សូមសាធារណជនមេត្តាជ្រាបជាព័ត៌មាន និងសូមកុំមានការភ័ន្តច្រឡំដូចសារព័ត៌មានមួយចំនួនបានចុះផ្សាយដែលមានលក្ខណៈញុះញង់ បំភ្លៃ និងបំប៉ោងព័ត៌មាន ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។