តុលាការឃុំខ្លួនបុរសម្នាក់រឿងបន្លំ(Hack) យកគណនីហ្វេសប៊ុក របស់ពិធីការិនីទូរទស្សន៍ម្នាក់ យកទៅបង្ហោះក្នុងន័យបង្ខូចបរិហារកេរ្តិ៍ ធ្វើឱ្យនាងអាប់ឱន និងខូចកេរ្តិ៍ឈ្មោះ
ភ្នំពេញ៖ នៅថ្ងៃទី៦ ខែសីហា ឆ្នាំ២០១៨នេះ លោក ហន សុខខេមរិន្ទ ចៅក្រមស៊ើបសួរសាលា ដំបូងរាជធានីភ្នំពេញ បានសម្រេចឃុំខ្លួនបុរសម្នាក់ដាក់ពន្ធនាគារ ចោទប្រកាន់ពីបទក្លែងបន្លំគណនីហ្វេសប៊ុក (Hack) របស់ពិធីការិនីទូរទស្សន៍ម្នាក់និងបរិហាកេរ្តិ៍ជាសាធារណៈតាមសង្គមហ្វេសប៊ុក។
ជនជាប់ចោទឈ្មោះ តាំង សុភិន អាយុ៣១ឆ្នាំ ស្នាក់នៅភូមិព្រៃញាតិ ឃុំព្រៃញាតិ ស្រុកគងពិសី ខេត្តកំពង់ស្ពឺ។ ជនរូបនេះធ្លាប់ត្រូវបានសមត្ថកិច្ចខណ្ឌសែនសុខឃាត់ខ្លួនម្តងពាក់ព័ន្ធករណីបៀតបៀនកេរ្តិ៍ខ្មាសម្តងហើយ។ ដើមបណ្តឹងជាជនរងគ្រោះ ដែលត្រូវគេក្លែងបន្លំគណនីហ្វេសប៊ុក (Hack) មានមុខរបរ ជាពិធីការិនីទូរទស្សន៍ (សុំមិនបញ្ចេញឈ្មោះ) ស្នាក់នៅសង្កាត់ទឹកល្អក់៣ ខណ្ឌទួលគោក រាជធានីភ្នំពេញ។
សូមរំឭកថាសមត្ថកិច្ច បានឃាត់ខ្លួន បុរសរូបនេះ កាលពីយប់ថ្ងៃទី៣១ ខែកក្កដា ឆ្នាំ២០១៨ នៅចំណុចកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញយោងតាមពាក្យបណ្តឹង របស់ជនរងគ្រោះ។ ក្នុងពាក្យបណ្តឹងបានបញ្ជាក់ថាក់ថា កាលពីថ្ងៃទី២៤ ខែកក្កដា ឆ្នាំ២០១៨ ជនសង្ស័យបាន ហេក (Hack) ហ្វេសប៊ុករបស់នាង ហើយយកទៅប្រើនិងបង្ហោះក្នុងន័យបង្ខូចបរិហារកេរ្តិ៍ ធ្វើឱ្យនាងអាប់ឱន និងខូចកេរ្តិ៍ឈ្មោះ ទើបសម្រេចចិត្តដាក់ពាក្យប្តឹង ឲ្យសមត្ថកិច្ច ជួយរកយុត្តិធម៌តែម្តង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។