បុរសចំណាស់ម្នាក់នៅខេត្តសៀមរាបស្លាប់ដោយសារជំងឺកូវីដ១៩ ក្រោយឆ្លងពីកូនជាបុគ្គលិកធនាគារនៅស្រុកសូទ្រនិគម
យោងតាមរបាយការណ៍របស់អាជ្ញាធរក្រុងសៀមរាបបានឲ្យដឹងថា នៅព្រឹកថ្ងៃទី១០ ខែមិថុនា ឆ្នាំ២០២១នេះ បុរសចំណាស់ម្នាក់ដែលមានអាយុ ៥៦ឆ្នាំ រស់នៅភូមិព្រៃធំ សង្កាត់ស្រង៉ែ ក្រុងសៀមរាប បានស្លាប់ ហើយក្រុមគ្រូពេទ្យបានពិនិត្យឃើញថា គាត់មានជំងឺប្រចាំកាយ និងមានវិជ្ជមានជំងឺកូវីដ១៩ ដែលបានឆ្លងពីកូនប្រុស និងកូនប្រសា។
របាយការណ៍បានបញ្ជាក់ថា កូនប្រុសរបស់គាត់មានឈ្មោះ ឃាន សុឃួច អាយុ៣០ឆ្នាំ ជាបុគ្គលិកធនាគារអេស៊ីលីដា សាខាស្រុកសូទ្រនិគម ត្រូវគេរកឃើញវិជ្ជមានកូវីដ១៩ ហើយកូនប្រសារបស់គាត់ឈ្មោះ លឿម សុផាន់ណា អាយុ ៣២ឆ្នាំ មានវិជ្ជមានកូវីដ១៩ដូចគ្នា។
បច្ចុប្បន្នផ្ទះរបស់គាត់ត្រូវសមត្ថកិច្ចចុះហ៊ុមព័ទ្ធ រីឯសពត្រូវបានក្រុមគ្រូពេទ្យដឹកយកទៅធ្វើបុណ្យនៅវត្តល្អក់ ស្ថិតក្នុងភូមិត្រពាំងទឹម ឃុំកណ្ដែក ស្រុកប្រាសាទបាគង ខេត្តសៀមរាប។
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។