ជំនួបរវាងនាយករដ្ឋមន្ត្រី និងថ្នាក់ដឹកនាំគណបក្សនយោបាយក្រៅរដ្ឋសភា ចាប់ផ្តើមហើយ
ជំនួបរវាងសម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយនិងគណបក្សនយោបាយដែលចូលរួមការបោះឆ្នោត បានចាប់ផ្តើមនៅវេលាម៉ោង៩ព្រឹកថ្ងៃទី២១ ខែសីហា ឆ្នាំ២០១៨នេះ ឯវិមានសន្តិភាព។
តាមការបញ្ជាក់របស់សម្តេចតេជោនៅលើបណ្តាញសង្គម កិច្ចជំនួបនេះ គឺនឹងពិភាក្សាក្នុងការបង្កើត “ឧត្តមក្រុមប្រឹក្សាពិគ្រោះយោបល់” រវាងរាជរដ្ឋាភិបាល និងគណបក្សនយោបាយទាំង២០ ដែលបានចូលរួមប្រកួតប្រជែងនៅក្នុងការបោះឆ្នោតកន្លងមកនេះ។ សម្តេចថា ការចូលរួមផ្តល់នូវមតិយោបល់ច្រើន គឺរមែងនាំមកនូវផលប្រយោជន៍វិជ្ជមានល្អៗច្រើនសម្រាប់ចូលរួមកសាងជាតិ។
ក្នុងជំនួបនោះ តំណាងគណបក្សនយោបាយក្រៅរដ្ឋសភា និងសម្តេចតេជោ ក៏នឹងមានការហូបអាហារសាមគ្គីរួមគ្នាផងដែរ ដែលបើតាមសម្តេចថា គឺគឺជាការបង្ហាញឲ្យឃើញថាយើងរួបរួមគ្នាជាកម្លាំងស្នូលនៃសាមគ្គីភាពនិងឯកភាពជាតិពិតប្រាកដតាមគន្លងលទ្ឋិប្រជាធិបតេយ្យ។
សូមបញ្ជាក់ថា គណបក្សនយោបាយដែលបានចូលរួមក្នុងជំនួបជាមួយសម្តេចនាយករដ្ឋមន្ត្រីនៅព្រឹកមិញនេះ គឺមានចំនួន១៦គណបក្សនយោបាយ ដោយអវត្តមានគណបក្សនយោបាយចំនួន៤ គឺគណបក្សមាតុភូមិយើង របស់លោក ច័ន្ទ ប៊ុនហន, គណបក្សប្រជាធិបតេយ្យមូលដ្ឋាន របស់លោក យ៉េន វីរៈ , គណបក្សសម្ព័ន្ធដើម្បីប្រជាធិបតេយ្យ របស់លោក ខឹម វាសនា និងគណបក្សខ្មែរឈប់ក្ររបស់លោក ក្រវ៉ាញ ដារ៉ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។