ការប្រឡងបាក់ឌុបនៅព្រឹកថ្ងៃទី២ មានដំណើរការល្អ តែមានបេក្ខជនខ្លះជួបបញ្ហាសុខភាព
ស្ថានភាពទូទៅ នៅព្រឹកថ្ងៃទី២ នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នេះ គឺមានដំណើរការរលូន ស្ងប់ស្ងាត់ និងមានសណ្តាប់ធ្នាប់ល្អទាំងក្នុង និងក្រៅមណ្ឌលប្រឡង ក៏ប៉ុន្តែមានបេក្ខជនមួយចំនួនបានជួបបញ្ហាសុខភាព ដោយខ្លះត្រូវបានបញ្ជូនទៅកាន់មន្ទីរពេទ្យ ខ្លះអាចមកប្រឡងឡើងវិញ ហើយក៏មានអ្នកត្រូវបង្ខំចិត្តប្រឡងក្នុងរថយន្តសង្គ្រោះ។
យោងតាមការផ្សាយរបស់ទំព័រហ្វេសប៊ុកផ្លូវការរបស់ក្រសួងអប់រំ យុវជន និងកីឡា បញ្ហាភាគច្រើនដែលបេក្ខជនជួបប្រទះ គឺការថប់ផ្លូវដង្ហើម វិលមុខ ខ្យល់ និងឈឺក្បាលជាដើម។
ក្នុងនោះអ្វីដែលគួរឲ្យកត់សម្គាល់ គឺមានបេក្ខជនម្នាក់នៅមណ្ឌលសាកលវិទ្យាល័យបាត់ដំបងត្រូវគ្រូអនុរក្សជួយកោសខ្យល់, បេក្ខជននៅមណ្ឌលវិទ្យាល័យក្រុងក្រចេះខាងកើតម្នាក់វិលមុខខ្យល់ មិនអាចធ្វើវិញ្ញាសារបាន ត្រូវបញ្ជូនទៅមន្ទីរពេទ្យ, បេក្ខជនម្នាក់ទៀតថប់ដង្ហើម ហើយត្រូវអនុញ្ញាតឲ្យប្រឡងក្នុងឡានពេទ្យ និងបេក្ខជនម្នាក់ទៀតមានជំងឺគ្រុនឈាម ត្រូវបានអនុញ្ញាតឲ្យព្យួរស៊ីរ៉ូមចូលប្រឡង។
ក្រៅតែពីបេក្ខជន ក៏មានអនុរក្សចំនួន២នាក់នៅមណ្ឌលវិទ្យាល័យសេរីសោភ័ណ និងវិទ្យាល័យអូរអំបិល មានអាការៈលើសឈាម វិលមុខ ហើយក៏ត្រូវទទួលបានការព្យាបាលបឋមដោយគ្រូពេទ្យប្រចាំមណ្ឌលផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។