ឆមាស​ទី​១​ឆ្នាំ​២០១៨ នេះ ក្រសួងពាណិជ្ជកម្ម​ចុះបញ្ជី​ម៉ាក​ផលិតផល ជិត​៤​ពាន់​មុខ​

​យោងតាម​របាយការណ៍​របស់​ក្រសួងពាណិជ្ជកម្ម បាន​បង្ហាញថា នៅក្នុង​ឆមាស​ទី​១ ឆ្នាំ​២០១៨​នេះ ក្រសួងពាណិជ្ជកម្ម​បាន​ចុះបញ្ជី​ម៉ាក​ផលិតផល​ជាតិ និង​អន្តរជាតិ ចំនួន​៣​​៨០៨​មុខ ធៀប​នឹង​រយៈពេល​ដូចគ្នា​ឆ្នាំ​២០១៧ កើនឡើង​១៦%​។

​បើតាម​របាយការណ៍ បាន​បញ្ជាក់ថា ឆមាស​ទី​១ នេះ ក្រសួង​បានទទួល​ពាក្យស្នើសុំ​ចុះបញ្ជី​ម៉ាក​ចំនួន​៣៨០៨​មុខ ក្នុងនោះ​ផលិតផល​ក្នុងស្រុក​ចំនួន​២.៦៧០​ម៉ាក និង​ម៉ាក​សញ្ញា​អន្តរជាតិ​ចំនួន​១១៣៨​មុខ។​

​ប្រធាន​នាយកដ្ឋាន​កម្មសិទ្ធិបញ្ញា លោក អប់ រ៉ា​ឌី បាន​ឲ្យ​ដឹងថា ការចុះបញ្ជី​ម៉ាក​ផលិតផល​មាន​សារសំខាន់ ព្រោះ​នៅពេល​ម្ចាស់​ម៉ាក​ចុះបញ្ជី​ត្រឹមត្រូវ និង​ស្របច្បាប់ ម្ចាស់​ម៉ាក​មាន​សិទ្ធិ​ប្តឹង​ជន​ណា​ដែល​បាន​ក្លែងបន្លំ​ម៉ាក ឬ​ទំនិញ​ដែលមាន​លក្ខណៈ​ដូច ឬ​ស្រដៀង ដែល​ធ្វើ​ឲ្យ​មានការ​ភាន់ច្រឡំ ក៏ដូចជា​ទទួលបាន​សិទ្ធិផ្តាច់មុខ​នៅពេលដែល​ម្ចាស់​ម៉ាក​បាន​ចុះបញ្ជី​ស្របច្បាប់​រួចហើយ​។​

​សូមបញ្ជាក់​ផងដែរ​ថា កាលពី​ខែឧសភា ឆ្នាំ​២០១៧ ក្រសួងពាណិជ្ជកម្ម​បាន​ដាក់​ឲ្យ​ប្រើប្រាស់​ប្រព័ន្ធ​ចុះបញ្ជី​ម៉ាក​ពាណិជ្ជកម្ម​តាម​អន​ឡាញ ដើម្បី​ផ្តល់​ភាពងាយស្រួល កាត់បន្ថយ​ពេលវេលា ការចំណាយ​ក្នុងការ​ស្នើសុំ​ចុះបញ្ជី និង​ការគ្រប់គ្រង​ប្រព័ន្ធ​ចុះបញ្ជី​ម៉ាក​ប្រកបដោយ​ប្រសិទ្ធភាព​៕​

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

Close