លោកត្រាំ អាចនឹងត្រូវដកហូតតំណែងប្រធានាធិបតី
អាមេរិក ៖ ដោយសារវិវាទផ្ទៃក្នុងកាន់តែខ្លាំងឡើង ពីមួយថ្ងៃទៅមួយថ្ងៃ សមាជិកព្រឹទ្ធសភាអាមេរិក លោកស្រី Elizabeth Warren មកពីរដ្ឋ Massachesetts បានអំពាវនាវដល់គណរដ្ឋមន្ត្រី និងសភា ដកហូតតំណែងប្រធានាធិបតីពីលោកត្រាំ ដោយសារតែបង្កឲ្យមានវិវាទកាន់តែខ្លាំងឡើង។ បន្ទាប់ពីមានអត្ថបទស្តីពីមន្ត្រីជាន់ខ្ពស់ ជាច្រើនរូបបានរិះគន់លោកត្រាំ។
លោកស្រី Elizabeth Warren បាននិយាយទៅកាន់សារព័ត៌មាន CNN ថា «ប្រសិនបើមន្ត្រីជាន់ខ្ពស់នៅក្នុងជួររដ្ឋាភិបាលរបស់ លោកត្រាំ មិនមានសមត្ថភាព ក្នុងការអនុវតន៍តាមភារកិច្ចរបស់លោកត្រាំ គួរតែពិភាក្សា តាមមាត្រាទី២៥នៃរដ្ឋធម្មនុញ្ញ ក្នុងការដកហូតដំណែង»។
លោកស្រី Elizabeth Warren បញ្ចាក់ថា «នៅក្នុងរដ្ឋធម្មនុញ្ញ បានបញ្ចាក់យ៉ាងច្បាស់ថា ក្នុងករណីអនុប្រធានាធិបតីនិងមន្ត្រីជាន់ខ្ពស់ នៅក្នុងជួរគណរដ្ឋមន្ត្រី យល់ឃើញថា ប្រធានាធិបតី មិនមានសមត្ថភាពនៅក្នុងការដឹកនាំទេនោះ មន្ត្រីទាំងអស់មានសិទ្ធ យកឯកសារចេញពីតុធ្វើការរបស់ប្រធានាធិបតី។ មន្ត្រីទាំងអស់បានស្បថការពាររដ្ឋធម្មនុញ្ញ អាមេរិក ហើយដល់ពេលដែលមន្ត្រីទាំងអស់ត្រូវធ្វើការងារបស់ខ្លួន»។
ការលើកឡើងរបស់ លោកស្រី Elizabeth Warren ដែលជាបុគ្គលអាចក្លាយជាបេក្ខភាពប្រធានាធិបតីនៅក្នុងការបោះឆ្នោត នាឆ្នាំ២០២០ ក្រោយពេលសារព័ត៌មាន New York Times បានផ្សាយនៅអត្ថបទវិភាគ របស់មន្ត្រីជាន់ខ្ពស់ក្នុងជួររដ្ឋាភិបាលដែលមិនបញ្ចេញឈ្មោះ បានបញ្ចាក់ថា គោលនយោបាយ បង្កឲ្យមានវិវាទ ចងគំនុំ និងខ្វះប្រសិទ្ធិភាព របស់លោកត្រាំ កំពុងតែធ្វើឲ្យអាមេរិកបែកបាក់ ហើយមន្ត្រីជាន់ខ្ពស់នៅក្នុងជួររដ្ឋាភិបាល បានខិតខំដើម្បីផ្លាស់ប្តូរ កម្មវិធីនយោបាយរបស់លោកត្រាំ។
នៅក្នុងអត្ថបទនោះក៏បានបញ្ជាក់ផងដែរថា សមាជិកគណរដ្ឋមន្ត្រីមួយចំនួន ក៏មានគម្រោង អនុវត្តតាមមាត្រាទី២៥នៃរដ្ឋធម្មនុញ្ញអាមេរិក ក្នុងការដកហូតសិទ្ធសម្រេចនយោបាយរបស់លោកត្រាំ ។ ប៉ុន្តែ មន្ត្រីទាំងនោះត្រូវផ្អាក់វិញ ដោយខ្លាចវិបត្តិកាន់តែធំ។ សេតវិមានបានប្រតិកម្មយ៉ាងខ្លាំងទៅលើអត្ថបទវិភាគខាងលើ ដោយចោទប្រកាន់ថាជា ជនក្បត់ និង ថោកទាប។
មាត្រាទី២៥នៃរដ្ឋធម្មនុញ្ញអាមេរិកបានកែតម្រូវបន្ថែមកាលពីឆ្នាំ១៩៦៧ បានកំណត់ពីវិធី កាត់ក្តីប្រធានាធិបតី ប្រសិនបើមិនមានសមត្ថភាពដឹកនាំប្រទេសជាតិ ដោយមូលហេតុផ្សេងៗ ឬក៏ស្លាប់ ។ ពេលនោះអនុប្រធានាធិបតី និងសមាជិកគណរដ្ឋមន្ត្រីភាគច្រើន គាំទ្រ អនុប្រធានាធិបតីនឹងឡើងកាន់តំណែងជំនួសវិញ ។
ប្រសិនបើចង់ផ្លាស់ប្តូរប្រធានាធិបតីកំពុងតែកាន់អំណាច គណរដ្ឋមន្ត្រីត្រូវផ្ញើលិខិតទៅកាន់សភា ក្នុងការបកស្រាយ ពីហេតុផល ប្រធានាធិបតីមិនសមស្របក្នុងការដឹកនាំប្រទេសជាតិ។ ពេលនោះសភាត្រូវការសម្លេងគាំទ្រ ២/៣ ទើបអាចដកហូតតំណែងប្រធានាធិបតីបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។