រថយន្តវីហ្គោបើកបុករថយន្តដឹកទំនិញបង្កឲ្យមនុស្សរបួសធ្ងន់៤នាក់
បន្ទាយមានជ័យ ៖ សង្ស័យតៃកុងងងុយដេក រថយន្តវីហ្គោមួយគ្រឿង បើកបុករថយន្តដឹកទំនិញពេញទំហឹង បង្កឲ្យមានមនុស្សរបួសធ្ងន់៤នាក់ កាលពីថ្ងៃទី០៦ ខែកញ្ញា ឆ្នាំ២០១៨ នៅលើកំណាត់ផ្លូវជាតិលេខ៥ ត្រង់ចំណុចខាងកើតផ្លូវចូលភូមិអញ្ចាញ ប្រហែល ១០០ម៉ែត្រស្ថិតក្នុង ភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
លោក សន គឹមសួគ៌ នាយការិយាល័យនគរបាលចរាចរណ៍ជើងគោកនៃស្នងការនគរបាលខេត្តបន្ទាយមានជ័យ បានឲ្យដឹងថា មុនពេលកើតហេតុ មានរថយន្តតូចម៉ាកវីហ្គោ ពណ៌ខ្មៅ បើកបរដោយឈ្មោះ សឹម សុភ័ណ្ឌណារិទ្ធិ ភេទប្រុសអាយុ២៥ឆ្នាំ ក្នុងទិសដៅពីលិចទៅកើត លុះដល់ចំណុចកើតហេតុ បានរេចង្កូតទៅបុករថយន្តធុនធំដឹកទំនិញមួយគ្រឿងពាក់ស្លាកលេខ ព្រះសីហនុ 3A-1832 បើកបរដោយឈ្មោះ ប៉ោ សុផុន អាយុ៣៨ឆ្នាំ បណ្តាលឲ្យរថយន្តទាំង២ ធ្លាក់និងបង្កឲ្យតៃកុងរថយន្តវីហ្គោ និង អ្នករួមដំណើរ៣ នាក់ទៀត រងរបួសធ្ងន់ ក្នុងនោះមានស្រីម្នាក់ ត្រូវបានដឹកទៅសង្គ្រោះនៅមន្ទីរពេទ្យមិត្តភាពកម្ពុជាជប៉ុន ស្រុកមង្គលបូរី។
ក្រោយកើតហេតុ រថយន្តទាំង២ ត្រូវបានស្ទូចយកមករក្សាទុកនៅស្នងការនគរបាលខេត្តបន្ទាយមានជ័យ ដើម្បីរង់ចាំការដោះស្រាយតាមនីតិវិធីច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។