ជនជាតិចិនចំនួន០២នាក់ដែលពាក់ព័ន្ធអំពើបាញ់ប្រហារជនជាតិចិនដូចគ្នាត្រូវបានចាប់ខ្លូន
ព្រះសីហនុ ៖ ជនជាតិចិនចំនួន០២នាក់ ដែលជាប់ពាក់ព័ន្ធអំពើបាញ់ប្រហារជនជាតិចិនដូចគ្នា ចំនួន ០៤នាក់ បណ្តាលឲ្យរបួសកន្លងទៅនោះ ត្រូវបានសមត្ថកិច្ច ធ្វើការស្រាវជ្រាវ ចាប់ខ្លូនបានហើយ បន្ទាប់ពីពួកគេព្យាយាមរត់គេចខ្លូន អស់រយៈពេលប្រមាណ២ខែ នឹង ធ្វើការដកហូតបាន កាំភ្លើងខ្លីចំនួន២ដើម ជាវត្តុតាងផងដែរ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ អោយដឹងថា ជនជាតិចិនដែលជាប់សង្ស័យ ចំនួន២នាក់ខាងលើ រួមមានទី ១-ឈ្មោះ REN HAI JUN ភេទប្រុស អាយុ ៤៦ ឆ្នាំ ជនជាតិចិន កាន់លិខិតឆ្លងដែនលេខ E០១១១៥៤៣៤ មុខរបរ មិនពិតប្រាកដ មានទីលំនៅ មិនពិតប្រាកដ។ ទី ២-ឈ្មោះ WU HAI ZHU ភេទប្រុស អាយុ ៣០ ឆ្នាំ ជនជាតិចិន កាន់លិខិតឆ្លងដែនលេខ E៩២១១១៩៨៥ មុខរបរ មិនពិតប្រាកដ មានទីលំ នៅមិនពិតប្រាកដ។ ពាក់ព័ន្ធការចាប់ខ្លូន ជនជាប់សង្ស័យខាងលើនេះ លោក ឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានបញ្ជាក់ថា កាលពីយប់ថ្ងៃទី១៥ ខែ កក្កដា ឆ្នាំ២០១៨ កន្លងទៅថ្មីៗនេះ ពួកគេបានប្រើប្រាស់កាំភ្លើងចំនួន២ដើម ធ្វើការបាញ់ ប្រហារជនជាតិចិនដូចគ្នា ចំនួន៤នាក់ ខណៈពេលក្រុមជនរងគ្រោះ កំពង់ផឹកស៊ីក្នុង ហាង «ស៊ី ហ៊ូ» ស្ថិតក្នុងភូមិលេខ ០១ សង្កាត់លេខ០៣ ក្រុងព្រះសីហនុ(តំបន់បឹងព្រែកទប់)បណ្តាលឲ្យ ជនរងគ្រោះ ទី ១-ឈ្មោះ ZHANG KUN ភេទប្រុស អាយុ ៣៩ឆ្នាំ ជនជាតិចិន ត្រូវចំភ្លៅខាងស្តាំ ទី២-ឈ្មោះ YANG HUAIHUN ភេទប្រុស អាយុ ៤១ឆ្នាំ ជនជាតិចិន ត្រូវចំក្បាលជង្គង់ខាងស្តាំ។ ទី៣-ឈ្មោះ YANG JUN GING ភេទប្រុស ២៧ឆ្នាំ ជនជាតិចិន ត្រូវចំចុងភ្លៅស្តាំ និងដើមកំភួន ជើងខាងឆ្វេង និងទី៤-ឈ្មោះ LIU WEIMIN ភេទប្រុស អាយុ៣៣ឆ្នាំ ជនជាតិចិន ត្រូវចំភ្លៅខាងស្តាំ។
ជនសង្ស័យទាំង០២នាក់ ក្រោយពេលធ្វើការបាញ់ប្រហារជនរងគ្រោះរួច ក៏បា រត់គេខ្លូន បាត់ស្រមោល ក្នុងពេលនោះតែម្តង គឺបានរត់គេខ្លូនអស់រយៈពេលជិត ០២ខែ ទើបសមត្ថកិច្ចធ្វើការការស្រាវជ្រាវ ចាប់ខ្លូនបាន នៅយប់ម៉ោងជិត១១ ថ្ងៃទី៥ខែកញ្ញា ២០១៨នេះ។
នៅចំពោះមុខសមត្ថកិច្ចប៉ូលិស ជនជាប់សង្ស័យទាំង០២នាក់ បានឆ្លើយសារភាព ថាមូលហេតុដែលពួកគេបាញ់ប្រហារជនរងគ្រោះ ដោយសារតែ ក្រុមជនរងគ្រោះកន្លងមក បាននិយាយប្រមាថមើលងាយពួកខ្លូន ថាជាមនុស្សដើរមិនត្រង់ផ្លូវ ដើរវៀចៗ គឹដើរបែបនេះមិន មែនជាមនុស្សល្អទេ ទើបពួកគេខឹង ក៏បានទិញកាំភ្លើងចំនួន២ដើមពីជនមិនស្គាល់មុខម្នាក់ ដោយ ក្នុង១ដើមតម្លៃ៣,៨០០ដុល្លា យកទៅបាញ់ក្រុមរងគ្រោះតែម្តងទៅ ។ ហើយក្រោយពេលធ្វើសកម្មភាពបាញ់ប្រហារក្រុមជនរងគ្រោះរួច ពួកគេក៏បានយកកាំភ្លើងចំនួន ០២ដើមនោះទៅលាក់ទុក ដោយកប់ក្នុងដីនឹងសង្ងំលាក់ខ្លូនបានមួយរយៈក៏ត្រូវសមត្ថកិច្ច ប៉ូលិស ស្រាវជ្រាវចាប់ខ្លូនបានតែម្តង។
បច្ចុប្បន្ន ជនសង្ស័យទាំង០២នាក់ខាងលើ ត្រូវបានសមត្ថកិច្ចប៉ូលិស នៃស្នងការដ្ឋាននគរបាល ខេត្តព្រះសីហនុ កំពុងកសាងសំណុំរឿងបញ្ជូនទៅសាលាដំបូងខេត្ត ព្រះសីហនុ ដើម្បីចាត់ការតាមផ្លូវច្បាប់។
គូររម្លឹកផងដែរថា ក្រុងព្រះសីហនុ ខេត្តព្រះសីហនុ នាពេលបច្ចុប្បន្ន នៅកន្លែងណា ក៏មានជនជាតិចិនដែរ ហើយអ្វីដែលគួរគត់សម្គាល់នោះគឺ វត្តមាន ជនជាតិចិនទាំងនោះ មានមុខរបររកស៊ី ភាគច្រើន បើកកាស៊ីណូ(អនឡាញ) បើកហាងស្រីម៉ាស្សា ស្រីរកស៊ី បំរើភ្លូវភេទ បើកក្លឹបកម្សាន្ត ប្រើប្រាស់ថ្នាំញៀន បង្កភាពអនាធិបតេយ្យ យ៉ាងពេញបន្ទុក ដូចជា បទល្មើស ចាប់មនុស្សជំរិតទារប្រាក់ ប្លន់ប្រដាប់អាវុធ បង្កើតបងធំបងតូច កាប់ចាក់គ្នា ស្ទើររាល់ថ្ងៃរួម នឹងបើកបរមិនគោរបច្បាប់ចរាចរណ៏ បង្កគ្រោះថ្នាក់ ជាប្រចាំ ធ្វើឲ្យប្រជាពលរដ្ឋ ខេត្តព្រះសីហនុ សម្តែងការព្រួយបារម្ភគ្រប់ពេលវេលា។
ប៉ុន្តែទោះជាយ៉ាងណាក៏ដោយ ប្រជាពលរដ្ឋខេត្តព្រះសីហនុសង្ឃឹមថា មន្ត្រីជាន់ខ្ពស់នគរបាលជាតិសំខាន់ចំនួន១១នាក់ ដឹកនាំដោយ លោកនាយឧត្តមសេនីយ ថោង លីម ដែលអគ្គនគរបាលជាតិចេញលិខិតបង្គាប់ការ ចុះថ្ងៃទី០១ ខែសីហា ឆ្នាំ២០១៨ ដើម្បីឲ្យចុះមក ជួយដឹកនាំពង្រឹង សន្តិសុខ សណ្តាប់ធ្នាប់ និងរៀបចំរបៀបរៀបរយសង្គម ក្នុងទឹកដីខេត្តព្រះសីហនុ ដោយប្រជាពលរដ្ឋរំពឹងថា វត្តមានមន្ត្រីជាន់ខ្ពស់របស់គនរបាលជាតិ ទាំង១១រូបខាងលើ នឹងធ្វើឲ្យខេត្តព្រះសីហនុ បានល្អប្រសើរឡើងវិញ និងលុបបំបាត់ឲ្យអស់ នូវអ្វីដែលជាភាពមិនប្រក្រតី កំពុងកើតមានក្នុងខេត្តព្រះសីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។