បុរសប្រមឹក ប្រើចបកាប់បុរសម្នាក់ រហូតដល់ស្លាប់ ត្រូវសមត្ថកិច្ចចាប់វាយខ្នោះ នៅស្រុកមោងឫស្សី
ខេត្តបាត់ដំបង៖ ករណីមួយបានបង្កឲ្យមានការភ្ញាក់ផ្អើលឡើង កាលពីថ្ងៃទី៨ ខែសីហា ឆ្នាំ២០២១ នៅចំណុចភូមិព្រាននិល ឃុំព្រៃតូច ស្រុកមោងឫស្សី ខេត្តបាត់ដំបង ដោយបុរសប្រមឹកម្នាក់ បានកាប់វាយបុរសម្នាក់ទៀត រហូតដល់ស្លាប់នៅនឹងកន្លែង។
ជនសង្ស័យឈ្មោះ ឡី លី ភេទប្រុស អាយុ២៧ឆ្នាំ រស់នៅភូមិចកធំ ឃុំកកោះ ស្រុកមោងឫស្សី ខេត្តបាត់ដំបង បានប្រើចបកាប់វាយទៅលើជនរងគ្រោះឈ្មោះ វ៉ាន់ ប្រឹក្សា (ហៅ ញេស) ភេទប្រុស អាយុ៥៥ឆ្នាំ រស់នៅភូមិចកធំ ឃុំកកោះ ស្រុកមោងឫស្សី បណ្តាលឲ្យស្លាប់នៅកន្លែង។
នគរបាលស្រុកមោងឬស្សី បានឱ្យដឹងថា ក្រោយពេលកើតហេតុទើបសមត្ថកិច្ចទទួលបានព័ត៌មាននេះ និងបានកំណត់មុខសញ្ញា ឃាត់ខ្លួនជនសង្ស័យតែម្តង ដោយក្នុងនោះ មានទាំងចបកាប់ដងឈើដែលជាមធ្យោបាយធ្វើសកម្មភាពផងត្រូវបានដកហូត។
ជនសង្ស័យ បានឆ្លើយសារភាពថា ដោយចោទជនរងគ្រោះថា បានចាប់រំលោភប្រពន្ធរបស់គាត់។ តែតាមការស្រាវជ្រាវ បានឃើញថាជនសង្ស័យនេះ គឺប្រពន្ធរបស់គាត់បានចាកចេញពីរូបគាត់ប្រហែលមួយឆ្នាំកន្លងមកហើយ។
ករណីនេះ នគរបាល បានរៀបចំកសាងសំណុំរឿងបញ្ជូនជនសង្ស័យទៅការិយាល័យជំនាញអនុវត្តតាមផ្លូវច្បាប់។ រីឯសពជនរងគ្រោះ បានប្រគល់ជូនក្រុមគ្រួសារធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។