រដ្ឋមន្ត្រីក្រសួងសេដ្ឋកិច្ច អះអាង ពីការបន្តនិរន្តរភាពរបស់មន្ទីរពេទ្យគន្ធបុប្ឆា ក្រោយមរណភាពលោក Beat Richner
ក្នុងឱកាសអញ្ជើញគោរពវិញ្ញាណក្ខន្ធសពលោកសាស្ត្រាចារ្យ Beat Richner ស្ថាបនិកមន្ទីរពេទ្យគន្ធបុប្ផា នៅមន្ទីរពេទ្យគន្ធបុប្ផា កាលពីរសៀលថ្ងៃទី១១ កញ្ញា ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានអះអាងថា មន្ទីរពេទ្យគន្ធបុប្ឆានៅតែបន្តនិរន្តរភាពតទៅទៀត ក្រោយការយកចិត្តទុកដាក់របស់រាជរដ្ឋាភិបាលកម្ពុជា។
ឯកឧត្តមបានលើកឡើងថា យើងបានពិភាក្សាគ្នាជាច្រើនដងអំពីការរៀបចំមន្ទីរពេទ្យគន្ធបុប្ផា ការធានានិរន្តរភាព ការងារនៃកិច្ចប្រតិបត្តិការរបស់មន្ទីរពេទ្យ ហើយធ្វើឲ្យមន្ទីរពេទ្យនេះក្លាយទៅជាមន្ទីរពេទ្យដែលស្ថិតនៅក្រោមការទទួលខុសត្រូវរបស់កម្ពុជា ដើម្បីកុមារកម្ពុជា ហើយយើងគិតថា វិញ្ញាណក្ខន្ធរបស់លោកសាស្ដ្រចារ្យ Beat Richner អាចសោយសុខក្នុងសុគតិភពបានហើយ ដោយសារថាបំណងប្រាថ្នារបស់លោកបានសម្រេចហើយតាមរយៈរាជរដ្ឋាភិបាលកម្ពុជាបានផ្តល់ការយកចិត្តទុកដាក់ខ្ពស់ក្នុងការរៀបចំកែសម្រួលការដឹកនាំក្នុងមន្ទីរពេទ្យ និងការរកហិរញ្ញប្បទានដើម្បីគាំទ្រដល់ប្រតិបត្តិការរបស់មន្ទីរពេទ្យតាមការដែលលោកសាស្ត្រាលោកស្រមៃចង់បាន មានន័យថា នៅក្រោយពេលមរណភាពរបស់លោកសាស្ដ្រាចារ្យ Beat Richner មន្ទីរពេទ្យគន្ធបុប្ផានៅតែបន្តនិរន្តរភាពដដែល។
ឯកឧត្តម អូន ព័ន្ធមុនីរ័ត្ន បានបន្ថែមថា យើងមានក្រុមការងារដែលធ្លាប់ធ្វើការជិតស្និទ្ធជាមួយលោកសាស្ដ្រចារ្យ Beat Richner យើងមានក្រុមការងារនៅទីនេះ ហើយសុទ្ធតែជាអ្នកដែលមានការប្តេជ្ញាចិត្តខ្ពស់នៅក្នុងការរក្សាស្តង់ដាគុណភាពនៃសេវាសុខាភិបាលរបស់មន្ទីរពេទ្យគន្ធរបុប្ផា ហើយថា ក្នុងនាមឯកឧត្តមជាប្រធានមូលនិធិគន្ធបុប្ផាកម្ពុជា នឹងបន្តកិច្ចសហការជាមួយនិងមូលនិធិគន្ធបុប្ផាស្វីស ហើយនិងមន្ទីរពេទ្យដើម្បីបន្តជួយដោះស្រាយខាងផ្នែកហិរញ្ញប្បទាន ប៉ុន្តែក្រសួងសុខា ភិបាលជាមួយនិងមន្ទីរពេទ្យខ្លួនឯងផ្ទាល់ នឹងបន្តការងារខាងផ្នែកបច្ចេកទេស និងការរក្សាស្តង់ដានៃការគ្រប់គ្រងខាងផ្នែកសុខាភិបាលដើម្បីធានាថា មិនឲ្យមានការធ្លាក់ចុះឡើយ គឺត្រូវតែបន្តនិរន្តរភាពរួមនិងការកែលម្អឲ្យកាន់តែប្រសើរឡើងថែមទៀត។
ជាមួយគ្នានេះឯកឧត្តម អូន ព័ន្ធមុនីរ័ត្ន ក៏បានអំពាវនាវសូមឲ្យប្រជាពលរដ្ឋកម្ពុជាបន្តទុកចិត្តមកលើរាជរដ្ឋាភិបាលក៏ដូច ជាមកលើមន្ទីរពេទ្យគន្ធបុប្ផាថា សេវារបស់មន្ទីរពេទ្យនេះរួមនិងនិរន្តរភាពរបស់មន្ទីរពេទ្យផង ដែរនឹងមិនត្រូវបានបាត់បង់ទេ ផ្ទុយទៅវិញគឺមានការតែការពង្រឹងបន្ថែមទៀត។ ដូច្នេះសូមឲ្យប្រជាពលរដ្ឋគ្រប់ស្រទាប់ជាន់ថ្នាក់បន្តគាំទ្រដល់កិច្ចប្រតិបត្តិការរបស់មន្ទីរពេទ្យនេះ ហើយខាងផ្នែកហិរញ្ញប្បទានគឺគាំទ្រដល់មូលនិធិគន្ធបុប្ផាកម្ពុជា តាមរយៈការចូលរួមវិភាគទានជា សមាជិកតាមប្រភេទដែលយើងមាន មានជាសមាជិកកិត្តិយស ឬក៏ជាសមាជិកគាំទ្រដែល មូលនិធិគន្ធបុប្ផាកម្ពុជានឹងបន្តខិតខំធ្វើដើម្បីកៀរគរហិរញ្ញប្បទានមកគាំទ្រដល់មន្ទីរពេទ្យគន្ធបុប្ផា។
គួររំលឹកថា លោកសាស្ត្រាចារ្យ Beat Richner ដែលជាស្ថាបនិករបស់មន្ទីរពេទ្យគន្ធបុប្ឆាបានទទួលមរណភាពដោយសារជំងឺក្នុងវ័យ៧១ឆ្នាំ នៅក្នុងទីក្រុង Zurich ប្រទេសស្វីស កាលពីថ្ងៃទី៩ ខែកញ្ញា ឆ្នាំ២០១៨ បន្ទាប់ពី លោកបានធ្លាក់ខ្លួនឈឺអស់ជាច្រើនខែមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។