បុរសដាក់មងម្នាក់នៅខេត្តពោធិ៍សាត់ ដាក់ជាប់ក្រពើទម្ងន់១រយគីឡូក្រាម
ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងនៅព្រឹកព្រលឹម ថ្ងៃទី២៥ ខែកញ្ញា ឆ្នាំ២០១៨ នៅក្នុងស្ទឹងមេទឹក ដែនជម្រកសត្វព្រៃភ្នំសំកុស ស្ថិតក្នុងភូមិកណ្តាល ឃុំថ្មដា ស្រុកវាលវែង ខេត្តពោធិ៍សាត់។
ពលរដ្ឋដែលឈ្មោះ មឿន មីន ភេទប្រុស បានថ្លែងឲ្យដឹងថា កាលពីល្ងាចម្សិលមិញ រូបគាត់បានទៅរាយមងរកត្រី នៅចំណុចកើតហេតុខាងលើ រួចក៏ទៅសម្រាកនៅផ្ទះបាត់។ ពេលព្រឹកឡើង រូបគាត់ក៏ភ្ញាក់ពីដំណេក ទៅដោះមង ភ្លាមនោះ ក៏ប្រទះឃើញមងជាប់សត្វម្យ៉ាងដែលមានសភាពរើបម្រាស់ខ្លាំង ក៏លើកទាញឡើងប្រទះឃើញជាប់សត្វក្រពើដ៏ធំមួយក្បាល ទម្ងន់ប្រហែលជាង១០០គីឡូតែម្តង។ រូបគាត់បានរាយការណ៍មកសមត្ថកិច្ច ឲ្យជួយអន្តរាគមន៍ លើកក្រពើរមួយក្បាលនោះមក។
បុរសរូបនោះបានឲ្យដឹងទៀតថា តាំងពីលោកប្រកបរបរដាក់មងរកត្រី នៅចំណុចស្ទឹងខាងលើ មិនដែលបានប្រទះឃើញសត្វក្រពើនោះឡើយ តែធ្លាប់តែលឺតៗគ្នាថា ស្ទឹងមេទឹកមានធនធានជីវចម្រុះជាច្រើន រាប់ទាំងសត្វក្រពើរ ត្រី កន្ទាយ…ផងដែរ។
បច្ចុប្បន្នសត្វក្រពើនេះ ត្រូវបានដឹកយកមករក្សាទុក នៅទីបញ្ជាការវរការពារព្រំដែនគោកលេខ៨២៥ រងចាំបញ្ជាពីថ្នាក់លើ។ ពុំទាន់មានការសន្និដ្ឋានឲ្យដឹងនៅឡើយទេថា សត្វក្រពើនេះ ជាសត្វក្រពើធម្មជាតិរស់នៅក្នុងស្ទឹងនោះ ឬក៏រួចមកពីណាទេ?
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។