កាកបាទក្រហមកម្ពុជា ចុះសួរសុខទុក្ខប្រជាការពារសង្កាត់ឬស្សីកែវ រងរបួសត្រូវគ្រាប់ជើងស្តាំធ្ងន់ធ្ងរក្នុងពេលបំពេញភារកិច្ច
(ភ្នំពេញ) ៖ ដោយក្តីអាណិតអាសូរ នៅថ្ងៃសុក្រ ទី ១២ ខែតុលា ឆ្នាំ២០១៨ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យ
មន្ត្រីក្រោមឱវាទ ចុះសួរសុខទុក្ខ និងនាំយកអំណោយមនុស្សធម៌ផ្តល់ជូនលោក លី រតនៈ អាយុ ៣៩ឆ្នាំ ប្រជាការពារសង្កាត់ឬស្សីកែវ ខណ្ឌឬស្សីកែវ ដែលរងរបួសជើងខាងស្តាំធ្ងន់ធ្ងរដោយត្រូវគ្រាប់កាំភ្លើង ខណៈពេលកំពុងបង្ក្រាបក្រុមក្មេងទំនើងក្នុងភូមិសាស្ត្រខណ្ឌឬស្សីកែវ កាលពីម៉ោង ១២ម៉៣០នាទី រំលងអធ្រាត ឈានចូលថ្ងៃទី ១២ ខែតុលា នេះ ហើយដែលកំពុងសម្រាកព្យាបាលនៅមន្ទីរពេទ្យកាល់ម៉ែត។
ក្នុងឱកាសចុះសួរសុខទុក្ខនោះ លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ និងក្តីអាណិតអាសូរចំពោះ លោក លី រតនៈ ដែលបានជួបគ្រោះថ្នាក់នេះ និងជូនពរឆាប់បានជាសះស្បើយពីរបួស ឆាប់ត្រឡប់ទៅជួបជុំគ្រួសារ និងបំពេញការងារដើម្បីប្រជាពលរដ្ឋវិញ។
លោក លី រតនៈ និងភរិយា មានក្តីរំភើបនិងថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ជួយសម្រាលការលំបាក ជាពិសេស លើកទឹកចិត្ត និងផ្តល់ភាពកក់ក្ដៅដល់ប្រជាជនរងគ្រោះដោយគ្មានការរើសអើងអ្វីឡើយ។
អំណោយដែលបានប្រគល់ជូនរួមមាន ៖ គ្រឿងបរិភោគ សម្ភារប្រើប្រាស់ និងថវិកាមួយចំនួន។ ដោយឡែក អ្នកជំងឺ ម្នាក់ ដែលកំពុងសម្រាកព្យាបាលក្បែរនោះ ក៏ទទួលបានថវិកាមួយចំនួនដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។